Albert Kruker daventa il nov directur da l'organisaziun turistica da Tavau/Claustra. Sco quai che l'organisaziun scriva en ina communicaziun succeda Kruker a Reto Branschi. El surpiglia sia nova lavur tar l'organisaziun turistica da Tavau/Claustra il pli tard il prim da fanadur 2024.
Blera experientscha en il sectur da turissem
Kruker ch'ha 48 onns è actualmain directur da l'organisaziun turistica da Lenk-Simmental en la Part sura Bernaisa. Avant è el stà manader da la promoziun dal lieu dal chantun Glaruna. Ed avant quai è el stà responsabel set onns en il marketing da Savognin turissem ed ha suenter la fundaziun dal Parc Ela gidà a stgaffir l'uffizi en il Grischun.
El sa legria da turnar en il Grischun, ha Kruker ditg tenor la communicaziun. La finamira da la destinaziun Tavau/Claustra era l'onn 2022 d'esser l'emprim lieu da vacanzas en Svizra neutral al clima fin l'onn 2030.
Cun surpigliar las fatschentas tras Kruker va a fin a Tavau in'èra. Reto Branschi maina anc sia 34avla stagiun d'enviern l'organisaziun da turissem. Suenter vegn el pensiunà.