Il derschader da la Dretgira administrativa ch'è stà en las lingias grassas ils ultims dis sa retira. Quai communitgescha sia advocata. La demissiun uffiziala saja vegnida surdada la mesemna a la cumissiun da giustia chantunala. Suenter reflexiuns intensivas e discurs en ses conturn social, saja il derschader sa decidì a quest pass. Quai surtut per proteger sia famiglia, l'instituziun, però era el sez sco persuna dad ulteriurs donns da reputaziun. La demissiun duai pussibilitar inquisiziuns neutralas ed independentas.
Ses uffizi sco derschader administrativ haja el adina ademplì cun plaschair ed engaschi. El saja persvas che las inquisiziuns vegnian a mussar l'andament da las chaussas e vegnian a distgargiar el, resulta da la brev a la cumissiun.
La fin d'emna passada era vegnì enconuschent ch'i marschia inquisiziuns penalas encunter in derschader da la Dretgira administrativa grischuna. Ina praticanta haja denunzià quest e renfatscha ad el d'avair violà ella. Capità saja quai il december 2021. Il derschader sez contesta las renfatschas. El haja a partir da l'entschatta cooperà cun las autoritads d'inquisiziun, ha ditg l'advocata dal derschader. Per el vala la presumziun d'innocenza.
En il decurs da l'emna aveva era la Procura publica dal Grischun reagì sin renfatschas ch'ins haja targlinà cun las inquisiziuns – però era sin la critica ch'ins n'haja betg incumbensà in expert u ina experta externa cun las inquisiziuns. Tenor la procura publica sajan ins stà obligà da surpigliar sez las inquisiziuns, essend persvas da pudair far las inquisiziuns da moda independenta.
