Tar la tschertga dad in u ina successura per il derschader ch'ha demissiunà suenter accusaziuns da violaziun datti dispitas. La PPS na vul betg exnum sa restrenscher sin candidats u candidatas cun emprima lingua taliana. En l'inserat da la plazza vegn quai pretendì.
Betg necessari per ina dretgira trilingua
Roman Hug, president da la PPS grischuna, di envers il Schurnal regiunal da SRF che quai saja in gieu politic da las autras partidas. I dettia gia ina derschadra che discurria talian, e l'atun vegnia l'entira Dretgira superiura, pia l'uniun da la Dretgira administrativa e la Dretgira chantunala, reelegida.
La cumissiun da giustia dal chantun accumpogna la tschertga per successurs. Sia presidenta, Julia Müller (PS), ha replitgà ch'il giavisch per ina persuna cun emprima lingua taliana saja vegnì da la Dretgira administrativa sezza.
Il temp per s'annunziar sin la plazza scada l'avrigl.
Il december è ina procedura penala pervia da violaziun cunter in derschader da la dretgira administrativa grischuna vegnida publica. Sin quai ha il derschader demissiunà. Per el vala la presumziun d'innocenza.
