Atras in rapport dal Blick è vegnida si la discussiun davart la consegna controllada da cocain. Pia dar giu cocain a persunas che han da basegn questa substanza en in rom controllà. Il suprastant da la citad da Cuira, Patrik Degiacomi relativescha quest rapport. El declara, che la citad haja mussà interess vi d'in project da pilot da la Confederaziun. Il sistem datti actualmain gia, dentant cun heroin.
Droga n'è betg gist droga
En l'ambulatori «Neumühle» a Cuira vegn dà giu heroin a moda controllada. La manadra, Margreth Meier declera ch’ins stoppia far la differenza tranter las singular substanzas. Numnadamain è heroin ina sort opioid. E tar quest funcziuni bain da dar giu controllà cun quai che las persunas èn suenter ina dosa saduladas per in entir di e pon prender part normal al mintgadi.
Auter vegn quai ad esser tar cocain. Tenor la manadra è quai ina substanza che fa vegnir engurd. Pia che quest aut che las persunas sentan è spert passà e che las persunas avessan spert puspè da consumar. Quai fa grev da dar giu la substanza a moda controllada.
Nagina colliaziun al local da consum
Margreth Meier vesa ina schanza da profitar da las experientschas che la citad vegn a far cun il local da consum. Pia ins vesa là quantas persunas che consumeschan cocain e quantas giadas ch’els consumeschan. La manadra da la «Neumühle» fa cler, che quest local da consum sto avair prioritad e pir suenter possian ins discurrer da la consegna controllada. Quai vesa era Patrik Degiacomi uschia. La consegna controllada da cocain saja in plan ch’è ina idea e che n'è anc betg concret u actual. Sco emprim sto era tenor el vegnir il local da consum. E là na dettia nagina colliaziun cun la consegna controllada. Pia al local da consum na vegnan dadas giu naginas drogas, mabain las persunas ston prender cun sezzas las substanzas ch’ellas vulan consumar. En futur savessi tranter questas duas chaussas dar ina colliaziun, dentant saja quai anc lunsch davent.
Or da l'archiv:
