Per l'onn 2024 budgetescha la regenza grischuna in deficit da 49,6 milliuns francs. Malgrà che numerus pajaments da la Banca naziunala svizra e da la Confederaziun vegnan a mancar, saja il preventiv 2024 anc equilibrà.
Dapli investiziuns
Il chantun vegn ad investir dapli il proxim onn. Las expensas d'investiziun planisadas per il 2024 importan 482,6 milliuns francs, l'onn 2023 eran quai 451,2 milliuns francs. Projects da construcziun auta ch'èn cuntegnids en il preventiv 2024 èn per exempel la renovaziun dal center da dietas al Plantahof, la construcziun da la nova halla da controlla da l'Uffizi per il traffic sin via a Roveredo, la renovaziun e l'engrondiment da l'Edifizi chantunal sco er la construcziun dal nov Center da scola auta spezialisada a Cuira.
La regenza propona al Cussegl grond en il rom dal preventiv 2024 ina reducziun dal pe da taglia da 5% per persunas natiralas. A partir da l'onn 2025 importia la reducziun fiscala annualmain bundant 32 milliuns francs, scriva la regenza. Uschia duai vegnir fatg in emprim pass per realisar in'incumbensa dal Cussegl Grond. Durant la sessiun da favrer 2023 ha il Cussegl grond acceptà in'incumbensa da Oliver Hohl (PLD) concernent distgargias fiscalas per famiglias e per persunas spezialisadas. Il segund pass saja planisà cun ina revisiun da la Lescha da taglia per il chantun Grischun l'onn 2025. La libertad d'agir finanziala duai uschia vegnir tratga a niz cumplainamain, declera la regenza vinavant. Las perditas da taglia dal chantun duain vegnir finanziadas tras futurs deficits dal quint da l'agen chapital a libra disposiziun.
Deficits creschents dal 2025 fin 2027
Il plan da finanzas actualisà per ils onns 2025–2027 mussia deficits che creschan fermamain e che importan tranter stgars 110 milliuns francs il 2025 e bundant 155 milliuns francs il 2027. Il svilup dals deficits saja d'attribuir d'ina vart a la creschientscha cuntinuanta dals custs e da l'autra vart a la stagnaziun dals retgavs.
Ina part dals deficits possian vegnir cumpensats l'agen chapital libramain disponibel. Quel duai vegnir duvrà per cumpensar la reducziun dal pe da taglia, investiziuns en projects da construcziun subvenziunads ed er per cumpensar las distribuziuns da gudogn tschessondas da la banca naziunala. Malgrà quai stoppian vegnir cuntanschidas cleras meglieraziuns cumpareglià cun ils deficits dal plan da finanzas, per tegnair las finanzas chantunalas vinavant en l'equiliber. En tut las fatschentas chantunalas, valia dad esser moderà, scriva la regenza.
Il Cussegl grond vegn a tractar il preventiv 2024 en la sessiun da december.
