Adrian Camartin
Correspundent Chasa federala
Sco president da l'Uniun purila svizra è Markus Ritter passà giu per ils pes ad inqual parlamentari en Chasa federala. Igl è perquai stà da spetgar che quels vegnan a nizzegiar l’elecziun dad oz per far giu quint cun el. Martin Pfister è qua sa preschentà sco alternativa valaivla, in candidat conciliant e pli liberal e cunzunt senza ballast. Entaifer curt temp ha el sco outsider uschia pudì gudagnar fidanza en il Parlament federal.
Igl è stà in’elecziun per Martin Pfister ed il medem mument era cunter Markus Ritter.
Ins sa perquai vesair l’elecziun da Martin Pfister sco elecziun da speranza. La maioritad dal Parlament federal spera ch’el porta in nov spiert da collegialitad e da solidaritad en il Cussegl federal. En quai temp burascus cun ina guerra en l’Europa e cura che la societad liberala è smanatschada da pliras varts dovri ina regenza che agescha a moda unida e collegiala. Quai n’è betg stà uschia ils davos onns, ma la speranza è che cun Martin Pfister daventa quai puspè il principi fundamental dal Cussegl federal.
Da l’autra vart è l’elecziun da Martin Pfister er ina gronda risca per il Parlament. Auter che ses concurrent Markus Ritter na enconuscha el betg las profunditads e las traplas da la politica federala.
Blers han bain la speranza che Pfister, sco anteriur colonel, vegn suenter numerus scandals e problems da far urden e po uschia puspè crear confidanza en l’Armada svizra. Sch’el vegn propi a scuar da radent tras ils sulers da las casernas, quai sto el dentant anc l'emprim cumprovar.
