Il chantun Grischun introducesch ina app en il cumbat cunter il coronavirus. La finamira da l’app è l’uschènumnà «contact tracing», pia da chattar ora cun tgi che persunas infectadas han gì contact. Quella app duaja cumplettar il sistem da «tracing» tradiziunal dal chantun. Quai ha ditg la media chantunala Marina Jamnicki.
Ina persuna malsauna sco er ils confamigliars da quella possian installar l'app sin il telefonin. Via app possian las persunas en quarantina lura restar en contact cun l’Uffizi da sanadad ed infurmar lez davart lur sa sentir.
