Bun dus terzs da las persunas dumandadas èn prontas d'installar ina «contact-tracing-app». Quai mussa la retschertga che l'institut Sotomo ha fatg per incumbensa da la SRG SSR.
I dovra tuttina anc lavur da persvasiun, scrivan ils perscrutaders en lur rapport: Mo perquai che blers din GEA a la dumonda, na munta quai anc betg ch'els installeschan lura era propi questa app. Surtut perquai che 40% din «GEA» – dentant 25% be «plitost GEA».
Talas apps giogan ina rolla centrala per pudair mussar la via da las infecziuns dal coronavirus e per pudair isolar persunas malsaunas. Impurtant è dentant ch'ina gronda part da la populaziun è pronta da sa participar voluntariamain ed installar in'app sin il telefonin.
