Igl è in cumbat tranter dus ch'èn da chasa en il mund da medias: Roger Schawinski, el che di ch'el haja invetà il radio privat en Svizra e Silvio Lebrument ch'ha surprendì l'imperi da medias Somedia da ses bab Hanspeter Lebrument. En quai cumbat vai per la concessiun da radio per la Svizra Sidorientala; pia il Grischun, Glaruna e parts da Son Gagl. Quella dat il dretg ed ils daners per far radio en questa regiun.
Schawinski vs. Lebrument
Actualmain ha la Somedia la concessiun cun Radio Südostschweiz – Roger Schawinski vul uss gia per la segunda giada, cun 78 onns, prender davent a la Somedia la concessiun. Questa giada cun il Radio Alpin. Sia finamira centrala saja da rumper il monopol da medias che la Somedia haja en questa regiun. Cun gasettas, radio, televisiun ed er online.
Quai è in dals davos e menders monopols en Svizra. Quai è forsa era in da mes davos cumbats.
D'in tal monopol na vul Silvio Lebrument dentant savair nagut, i dettia er anc Radio RTR, Radio SRF ed era purschidas online ed en las medias socialas. El è era persvas che la concessiun resta tar la Somedia cunquai ch'il concept da Radio Alpin na funcziunia betg.
La rinfatscha dal monopol è per me, stgisai, tup.
Sajettà vegn pia dad omaduas varts ed omadus èn persvas ch'els hajan il meglier concept per far radio. Omadus han uss er inoltrà a l'Uffizi federal per communicaziun (BAKOM) la dumonda per la concessiun. La fin da l'onn vegn lura decidì tgi che dastga far radio en la Svizra Sidorientala.
Era firmas ed instituziuns prendan posiziun
La dumonda tgi che survegn la concessiun davent dal 2025 para d'interessar lunsch sur il mund da medias. Uschia han 31 firmas ed instituziuns scrit a l'Uffizi da communcaziun federal (BAKOM) daco che Radio Südostschweiz (RSO) u daco che Radio Alpin duess survegnir la nova concessiun. Ils parairis èn là dentant clers: la gronda part sustegna RSO. Quai per exempel l'uniun purila grischuna, la firma Hamilton SA u era Gastro grischun.
Sur decenis ha il radio promovì la diversitad da linguas e cultura en noss chantun. Jau na sai betg sch'in radio ch'è staziunà a Turitg vegniss da porscher il medem.
In ferm aderent da Radio Alpin è sulettamain l'EMS Chemie. Lezza fa attent che la Somedia saja in vair monopol da medias cun gasettas, televisiun e radio. In nov emettur da radio en la regiun faschess bain. Envers RTR n'ha ella betg prendì posiziun. Ma en lur posiziun tar il Bakom scrivan els:
Questa posiziun da monopol lubescha a la Somedia da tractar a moda selectiva tscherts temas...
Che gist la EMS-Chemie è il grond simpatisant da Radio Alpin fa dentant surstar. Roger Schawinski è ina persuna ch'è adina stada plitost critica envers la PPS. E Christoph Blocher, anteriur schef da la la EMS-Chemie ha ils onns 80 cun bler daners spendrà la gasetta dal Bündner Tagblatt, ch'è oz part da la Somedia.
Or da l'archiv: il cumbat ha tradiziun
