Il parlament da la citad da Cuira ha discutà l'emna passada davart l'iniziativa dal clima da citad. Quella era vegnida surdada a la citad avant in onn. Il cussegl da la citad ha preschentà ina cuntraproposta.
Il comité da l'iniziativa ha dentant refusà quella. Ella na saja betg lianta. Plinavant sa mussa il comité da l'iniziativa trumpà dal messadi dal parlament, sco ch'el scriva en ina communicaziun a las medias.
Ils custs sajan exagerads e na calculads endretg, l'iniziativa possia vegnir realisada a moda bunmartgada. Perquai refusa il comité la cuntraproposta e vul laschar votar las persunas da Cuira davart sia iniziativa.
L'iniziativa dal clima da citad vul che 1% da la surfatscha da Cuira ad onn daventa spazi verd, vias da velo u zonas da sentupada. Per la citad saja quai dentant memia liant, e giaja in pass memia lunsch.
La cuntraproposta dal cussegl da la citad vul bain dapli zonas a favur dal clima, dentant realisar quellas a moda effizienta. Quai vul dir: ins veglia cumbinar projects nua ch'i vegn gia bajegià e lura gest examinar sch'ins pudess crear dapli spazi verd u per velos e peduns. Perquai ch'i spetgia a Cuira blers plazzals sin las vias entras las novas lingias da l'IBC saja quai ina buna chaschun.
In motiv daco che la iniziativa va ord vista dal cussegl da la citad memia lunsch èn era las finanzas. Pertge l'iniziativa custia a la citad circa 35 milliuns francs – 3,5 milliuns francs ad onn. Cunquai ch'i spetgia ils proxims onns cun blers gronds projects bleras investiziuns per la citad da Cuira na sappia la citad betg sa prestar quai. Per la cuntraproposta quinta la citad cun 400'000 enfin 750'000 francs ad onn.
Il comité di dentant, che 35 milliuns saja «cumplettamain exagerà». I vegnia er quintà ils custs per far vias cun craps da sulada, quai n'haja da far nagut cun lur iniziativa. Ed il cussegl haja er quintà vitiers las vias d'alps ed uschia augmentà ils custs supponids da l'iniziativa.
Il parlament ha refusà l'iniziativa cun 11 cunter 10 vuschs ed ha approvà la cuntraproposta cun 13 cunter 8 vuschs. L'iniziativa sco era la cuntraproposta van en votaziun ils 3 da mars 2024.
