Il comité d'iniziativa ha surdà a la chanzlia da Cuira l'inziativa cun 1'530 suttascripziuns. Necessarias fissan stadas 800 suttascripziuns. Plinavant avessan ils iniziants anc gì temp in ulteriur mez onn per rimnar tut las suttascripziuns.
Damain grisch – dapli verd
L'iniziativa vul transfurmar durant 10 onns mintg'onn 1% dal terren da Cuira. U ch'ins remplazza il terren cun surfatscha verda, u ch'ins lascha quel per peduns e ciclists, enstagl per il traffic motorisà. Uschia saja quai era ina contribuziun a la protecziun dal clima. Pli bler vegetaziun duai era far pli empernaivel il clima a Cuira. Sco Anita Mazzetta, ina da las iniziantas e manadra dal WWF Grischun di, possia la citad vegnir bunamain 10% pli chauda che la champagna. Perquai duai la surfatscha da la citad vegnir nizzegiada auter, argumenteschan ils iniziants.
12 organisaziuns e partidas da la sanestra han lantschà l'iniziativa. L'iniziativa dal clima da citad è ina da pliras iniziativas lantschadas da l'organisaziun umverkehR. La citad da Cuira è la 8avla citad che surdat l'iniziativa. Sco proxim discutescha la suprastanza da Cuira l'iniziativa e silsuenter tracta il parlament quella e la fin decida il pievel.