Betg mo la Bassa ha da cumbatter cun ina mancanza da scolastas e scolasts. Tenor ina retschertga tar ils manaders da scola ha er il Grischun fadia da chattar avunda persunal.
Quest onn han 250 plazzas stuì vegnir occupadas da nov. Er sche betg tut las plazzas n’han pudì vegnir occupadas, survegn mintga scolar in scolast ubain ina scolasta. Schliaziuns hajan els chattà per part en il team cun auzar il pensum ubain midar plazzas. Auters hajan mess ensemen classas.
Tar las plazzas ch’els han occupà da nov haja dà fitg paucas annunzias. Sulet per surprender classas primaras èn en media otg persunas s’annunziadas, uschia ch’ils manaders han gì in’elecziun. Las plazzas da scolina cun tschintg annunzias en media hajan era purschì ina schelta minimala.
Sin il stgalim secundar e tar las plazzas per pedagogs e pedagogas curativas haja dà mo ina fin duas annunzias. Quai che dat anc en egl tar quellas annunzias: Per gronda part manca la qualificaziun formala. Quellas persunas hajan retschavì ina lubientscha temporala dal chantun.
Per ils scolasts e las scolastas, sco era per ils manaders da scola saja quai in grond sforz. I saja perquai nairas uras d'agir.
La situaziun naziunala
D'ina mancanza da persunal, discurra l'Associaziun tetgala svizra da magistras e magisters en vista al nov onn da scola. Per pliras tschient plazzas manchian anc scolasts, hai gì num avant las medias a Berna. E damai ch'il persunal qualifitgà manchia – sa gidian las scolas savens cun emploiar persunas che n'han anc betg finì lur scolaziun. Savens mainia quai ad ina chargia supplementara per la magistraglia, enstagl d'ina distgargia. L'Associaziun tetgala svizra da magistras e magisters pretenda perquai tranter auter cundiziuns da lavur modernas, e da procurar che la stima da la professiun creschia.
Ina ulteriura sfida saja suenter la pandemia uss la guerra en l'Ucraina ed il grond dumber d'uffants e giuvenils che saja vegnì en Svizra. Las vischnancas dovrian dapli sustegn finanzial e persunal dals chantuns e da la Confederaziun. Las scolas na possian betg surpigliar l'integraziun ed educaziun sulettas.
Dapli sustegn era per il servetsch psicologic da scola
Era il servetsch social e psicologic da las scolas dovria urgentamain dapli resursas. Quai simplifitgass era l'integraziun dals uffants da l'Ucraina. Pervi da las experientschas durant la pandemia, pretendan ils magisters e las magistras era in stab naziunal, perquai ch'i saja sa mussà, che structuras federalisticas hajan limitaziuns cura ch'i dovra mesiras unifitgadas.
