La bell'aura e las temperaturas durant la chatscha hajan gì in effect negativ sin la chatscha 2019 – uschia l'emprim facit dal pli aut chatschader grischun, Adrian Arquint.
Il pavel sin l'autezza saja stà bun quest onn ed haja fatg restar blera selvaschina en ils auts. Dentant saja la bilantscha tenor animal e regiun fitg differenta.
Grondas differenzas e nagliur propi bun
En il Puschlav, la Val Müstair e la part sura da l'Engiadin'Ota haja dà ina buna chatscha da tschiervs. Tuttina na saja betg vegnì sajettà in grond dumber da tschiervs.
Ina chatscha da tschiervs plitost mediocra haja quai dà en la Bregaglia, en la Surselva ed en il Partenz. E tut il rest dal chantun haja gì ina chatscha da tschiervs sut la media, terminescha Adrian Arquint la survista chantunala.
Chatscha supplementara er il 2019
Cler è per Arquint: Cunquai che la finamira da 5'560 tschiervs n'è betg cuntanschida, datti ina chatscha speziala. Quants tschiervs che stoppian vegnir sajettads la fin finala durant la chatscha speziala sa mussa, cura che tut las cifras sajan sin maisa. Quai vegnia ad esser il cas en il decurs da las proximas duas emnas.
Er l'influenza dal luf è fitg differenta
En la Surselva sentian ins tenor Adrian Arquint l'influenza dal luf. Tge influenza ch'il luf ha dentant sin la dinamica ed il moviment da la selvaschina saja grev da dir. In'influenza haja dentant era il luf-tscherver en la Surselva. En la regiun dal Calanda saja la situaziun dentant sa calmada in pau.
RR novitads 12:00
