RTR: Tge ha motivà Vus da s’annunziar per questa plazza?
Nadina Derungs: Jau poss be dir: Cudeschs èn mia vita. Jau hai gia lavurà en ina libraria, hai studegià litteratura rumantscha, sun commembra da la giuria e sun stada en il comité d’organisaziun dals Dis da litteratura. – Litteratura e spezialmain la litteratura rumantscha ha accumpagnà mai durant quasi mia entira vita. Lura hai jau pensà: Quai stoss jau simplamain empruvar.
Tge è l’incumbensa d’ina manadra d’ina chasa editura?
Igl è ina lavur fascinanta. In’editura ha in fitg vast spectrum d’incumbensas. D’ina vart vai per il program, la selecziun dals cudeschs. La CER fa quai ensemen cun duas cumissiuns editorialas. Da l’autra vart vai lura per il surlavurar dal cudesch, da la producziun dal cudesch cun l’impaginaziun, la stampa. Suenter suonda l’intermediaziun dal cudesch a la publicitad. Quest vast spectrum da lavur è fitg fascinant.
Co gida Voss satgados a Vus da manar il futur la Chasas Editura Rumantscha?
Jau na less insumma betg dir ch’jau sappia gia exact co jau vegn a manar questa chasa editura. Jau sun da l’avis ch’igl è adina in emprender. (...) Jau less emprender co igl è vegnì fatg enfin uss, co Anita Capaul ha bajegià si or dal nagut ina chasa editura. Lura vai segir er per definir ina strategia ch’i na dat enfin uss anc betg. E lura guardar tge midadas ch’i dat. Jau n’hai betg l’aspectativa da savair tge midadas ch’jau vegn a far.
Anita Capaul ha chalà suenter 14 onns a la testa da la Chasa Editura Rumantscha. Ella lascha pia enavos gronds fastizs. Co emplenis quels?
Fitg gronds fastizs. Jau hai respect da quai. Da l’autra è Anita Capaul anc adina en tiara, uschia ch’ins po anc ir a dumandar ella chaussas. Da l’autra vart èsi en mintga cas er in emprender e tschertas experientschas hai jau hai jau era dastgà far en la branscha editoriala, uschia ch’i dat il futur in bun mix.
En media dat la Chasa Editura Rumantscha ora mintg’onn 6 cudeschs. Tge focus tematic vulais Vus dar?
Da definir il focus tematic è grev, cunquai ch’i dependa er fitg ferm tge che auturas ed auturs rumantschs han en lur truchet. Il focus vegn a restar en mintga cas en belletristica, quai munta prosa e lirica rumantscha. Da l’autra vart hai ils ultims onns adina er dà dapli antologias, uschenumnadas rimnadas da texts. In ferm focus vuless jau er metter sin litteratura per uffants e giuvenils. Litteratura dovri da pitschen ensi.
