Il 2010 ha Anita Capaul cumenzà sco manadra da la Chasa Editura Rumantscha CER. Uss mida ella tar il chantun, sco la CER annunzia en ina communicaziun a las medias. Là vegnia ella davent dal zercladur ad esser responsabla en il «champ da la digitalisaziun per las vischnancas».
Ella ha bajegià si e manà la CER dapi la fundaziun ed haja «posiziunà cun inschign quella chassa editura en la branscha». La Lumneziana possia guardar enavos sin var 100 publicaziuns, tschients preschentaziuns da cudeschs e plirs bels success da premiaziuns. Las societarias Urezza Famos e Manuela Balett deploreschian fitg la decisiun da Capaul.
In sguard en il passà
L'onn 2009 è la Chasa Editura Rumantscha (CER) vegnida fundada da la Lia Rumantscha ensemen cun la Pro Helvetia ed il Chantun Grischun. La lavur da scripturs e scripturas rumantschas duessia uschia vegnir promovida e levgiada. Ina chasa editura rumantscha è ditg stada in giavisch dad auturas ed auturs.
La Chasa Editura Rumantscha – Ils cumenzaments
Suenter la fasa da pilot – ch'ha cuzzà ils emprims trais onns – hai dà obstachels en connex cun la finanziaziun da la CER. L'avegnir da la CER sco era la plazza da la manadra Anita Capaul eran en quest temp in pau intscherts. La Lia Rumantscha ed il chantun han stuì tschertgar schliaziuns.
L'Avegnir en privel (2012/13)
La CER ha publitgà var 100 ovras – er en furma da cudeschs auditivs – dapi sia fundaziun. In sguard en l'archiv da RTR mussa ch'ils Rumantschs e las Rumantschas èn interessads ed interessadas vi da litteratura rumantscha. Era naziunal han tscherts auturs ed auturas che han publitgà en la CER gì success.
Ediziuns e publicaziuns
La Chasa Editura Rumantscha exista gia pli che 10 onns. En ils onns da giubileum ha la Televisiun Rumantscha mintgamai dà in sguard enavos sin il svilup e la situaziun da la CER.