Las suandantas mesiras da protecziun valan a partir dals 4 da december a las 23:00 enfin venderdi ils 18 da december 2020. Las regulaziuns da la scola valan enfin mesemna, ils 23 da december 2020. La controlla da las mesiras è en ils mauns da las vischnancas.
Radunanzas ed inscunters:
- Betg dapli che 10 persunas pon s'inscuntrar en il rom privat.
- Betg dapli che 10 persunas pon sa rimnar en il spazi public, en spezial sin plazzas, promenadas, trottuars e vias da spassegiar sco era parcs.
Restaurants, bars, cafes euv.:
Restaurants, pubs, bars, brasserias, bars (inclusiv talas che fan part da pasternarias, tancadis, staziuns, hotels u campadis) èn da serrar cun suandantas excepziuns:
- Furniziun e repartiziun da mangiativas a chasa enfin la saira a las 22:00.
- Martgads, per ils quals il consum al lieu è scumandà.
- Take-away al spurtegl (cun 1,5 meters distanza tranter las persunas), er enfin las 22:00 la saira.
- Cantinas socialas, cantinas en ospitals e chasas da tgira, mo cun resguardar las mesiras da protecziun (paraids da plexiglas, obligatori da mascras, seser al lieu, maximal 4 persunas vid ina maisa, 1,5 meters distanza tranter persunas che sesan vid differentas maisas)
- Cantinas da persunal che n'èn betg accessiblas al public, er cun resguardar las mesiras da protecziun numnadas sura.
- Cantinas da scola ed en chasas da dimora, er be cun resguardar las mesiras da protecziun.
- Ustarias che tutgan tar in hotel pon be avair avert per giasts da l'hotel ed er qua cun mesiras da protecziun.
Lieus da divertiment e temp liber:
- Serrads èn kinos, teaters, museums, gallarias, bibliotecas e mediatecas, centers da sport e fitness (cun excepziun da hallas da sport da scola), hallas da raiver, indrizs da sport sin glatsch, stadions d'atletica leva e sumegliant, centers da wellness, bogns publics, hallas da bowling, clubs, hallas da concert e sumegliant.
- Excepziuns valan per indrizs da wellness d'hotels, per giasts dals hotels sco er indrizs dal temp liber giuadora, sco patinieras, pumptracks e sumegliant, quai sche las mesiras da protecziun pon vegnir resguardadas.
video
Mini-lockdown en Grischun: Ustarias e lieus da temp liber
Or da Telesguard dals 04.12.2020.
laschar ir. Durada: 2 minutas 15 Secundas.Activitads sportivas:
- Occurrenzas, activitads e radunanzas da passa 10 persunas en stanzas publicas e privatas èn scumandadas.
- Sports da contact (ballape, ballabasket, hockey, sport da cumbat, euv.) èn scumandads. Lubì èsi a sportists professiunals da trenar davos portas serradas sco er il trenament individual.
- Activitads sportivas d'uffants e giuvenils sut 16 onns èn lubidas entaifer las restricziuns da la Confederaziun, quai cun excepziun da concurrenzas.
- Er lubids èn trenaments e concurrenzas en il sport da prestaziun per persunas ch'appartegnan al cader naziunal d'in sport (tenor indicaziuns da swiss olympic). Quai u sco trenament singul u en gruppas da maximal 15 persunas. Er lubids èn exercicis da teams da las ligas cun in manaschi da sport professiunal.
Occurrenzas:
- Occurrenzas cun passa 10 persunas en il spazi public u er privat èn scumandadas. Quest scumond na vala betg per occurrenzas politicas, radunanzas e sumegliant. Ulteriuras excepziuns po l'Uffizi da sanadad lubir, en spezial sch'i dat in grond interess public.
- Servetschs religius u sepulturas pon vegnir realisadas cun resguardar a moda stricta las regulaziuns da purtar mascra e d'igiena, sco er cun sa tegnair vid ils concepts da segirezza da maximal 50 persunas.
Scolas:
En scolas privatas e publicas vala sin l'entir areal da scola per tuttas persunas in obligatori da mascra. Cun excepziun da:
- scolaras e scolars sin stgalim da scolina u da la primara.
- Per persunas che pon mussar si ch'ellas na pon per raschuns medicinalas u spezialas betg purtar ina mascra, lura vala da far diever d'ulteriuras mesiras da protecziun
video
Reacziuns sin las novas mesiras dal chantun
Or da Telesguard dals 04.12.2020.
laschar ir. Durada: 3 minutas 52 Secundas.Tge manegiais Vus? Vossa opiniun ans interessescha - commentai!
