Schebain che l'uvestg Vitus Huonder è anc en uffizi han las discussiuns per ses successur gia ditg cumenzà. Tar il parlament catolic, il Corpus catholicum, sa bada che las discussiuns internas han survegnì fieu.
Sin la dumonda da dir insatge pertutgond l’uvestgieu a Cuira han ils blers ditg «Pli gugent di jau nagut, igl è in tema delicat». In per paucs han tuttina prendì posiziun.
In favurit vai jau betg. Ed era sche jau vess in na schess jau quai betg. Dentant aud’ins schon in ni l’auter num.
Per tscherner in nov uvestg elegia il chapitel catedral ina persuna ord ina proposta da trais. Quella proposta da trais vegn da la Sontga Sedia a Roma, pia dal papa.Usitadamain sa basa quella porposta dal papa sin infurmaziuns ord l'uvestgieu en dumonda sez. Suenter l'elecziun dal nov uvestg entras il chapitel catedral po il papa lura confermar quel. Il chapitel catedral consista da 24 canonis.
Però causa che l’uvestgieu a Cuira ha adina puspè tgirà per lingias grassas, ha uss fatg il vicari general Martin Kopp la proposta da metter in uffizi in administratur apostolic empè dad in uvestg elegì dal chapitel catedral. Cun quai avess l’uvestgieu a Cuira ina regenza provisorica.
Sch’ins metta en in administratur apostolic vul quai dir che l'antecesseur n'ha betg fatg endretga sia lavur. E rinfatschar a l'uvestg Huonder ch'el haja fatg insatge fallà tenor dretg canonic na san ins betg.
La finamira dad ina tala regenza provisorica fiss da quietar la situaziun actuala en l’uvestgieu. L’idea da l'administratur apostolic n'è dentant betg tant bainvisa tar il Corpus catholicum. Quietar la situaziun duess directamain il nov uvestg.
L'uvestg ideal
Tenor Placi Berther sto in uvestg avair bleras abilitads. El na sto betg mo esser in pastur e teolog, ma era avair abilitads dad in CEO dad ina firma. I duai esser ina persuna che ha ina abilitad dad ir e discurrer cun la glieud.
I stuess esser ina persuna ch'è pronta da tschertgar in equiliber tranter conservativ e liberal. Extrems n'èn mai buns.
Il commember dal Corpus catholicum Aurelio Casanova sa giavischa in uvestg giuven. In uvestg che ha visiuns ed è abel dad inspirar la giuventetgna per la baselgia.
Sch'i dat proxim onn in nov uvestg u betg è anc avert. Cun ses 75avel anniversari è Vitus Huonder oblià da dar en la desditga a Roma. En cas usità vegn lura er tscherni in nov uvestg. Dentant ha igl era gia dat il cas, ch'il papa ha laschà en uffizi a l’in u l’auter uvestg era suenter il 75avel.