- Las pajas per scolastas e scolasts da tut ils stgalims, sco era da pedagogas curativas, che cumenzan en il Grischun duain crescher.
- La scolina duai daventar obligatorica per tut ils uffants en il Grischun.
- La regenza vul simplifitgar l'integraziun d'uffants ch'han basegn d'agid supplementar.
- Il chantun dat sustegn finanzial supplementar a las scolas per cumprar meds digitals, per excursiuns e projects.
La regenza grischuna ha preparà ina revisiun parziala da la lescha davart scolas popularas dal Grischun. En tut èn 12 midadas previsas. Qua tscherts puncts centrals:
Pajas vegnan adattadas a la Svizra Orientala
Scolasts e scolastas, sco era pedagogs e pedagogas curativas, duain survegnir dapli paja d'entrada – e quai sin tut ils stgalims da scola:
Las pajas minimalas duain pia vegnir auzadas sin la media da la Svizra Orientala. Il pli grond augment tar la paja d'entrada minimala da persunas d'instrucziun da scolina. Sin ils auters stgalims vegn la paja minimala auzada per circa 6'000 francs ad onn. Questas adattaziuns vegnan ad avair consequenzas per ils preventivs dals purtaders da scola respectivamain da las vischnancas politicas.
La scolina daventa obligatorica
Il Grischun è il sulet chantun en Svizra, nua che la scolina n'è actualmain betg obligatorica. Quai duai sa midar: da nov duain tut uffants en il chantun stuair visitar la scolina. Enstagl da be nov onns da scola obligatorics – sco fin uss – munta quai 11 onns obligatorics per tut ils uffants da scola.
Simplifitgar l'integraziun
Da nov duain las scolas grischunas survegnir dapli pussaivladads d'organisar l'instrucziun ed er il sustegn dals uffants cun basegn da promoziun. Concret duai vegnir pli simpel da far ina maschaida tranter l'instrucziun en classa e l'instrucziun separada cun il pedagog u la pedagoga curativa.
Dapli finanzas per digitalisaziun, projects ed excursiuns
Il chantun duai sustegnair las scolas tar ils custs supplementars per meds digitals, sco cumputers u tablets. Reglà vegn quai sur la pauschala che las scolas survegnan per mintga uffant. Previs èn circa 100 francs dapli per uffant sin stgalim primar e circa 300 francs ad onn dapli per il stgalim superiur.
Er il budget per uffant per excursiuns u emnas da project duai s'augmentar. Planisada è ina pauschala da 20 francs per uffant a di – u maximalmain 1'500 francs per classa, project u excursiun.
Midadas duain adattar il sectur da scola al temp actual
L'ultima giada han ins il 2012 midà la lescha. Dapi lura sajan sa midadas las pretensiuns envers la scola, scriva la regenza. La regenza implementescha era las incumbensas dals deputads dal Cussegl grond. Ella ha deliberà la missiva per mauns dal Cussegl grond che tracta questa fatschenta durant la sessiun dal december. Sche tut funcziuna sco previs, van las midadas en vigur a partir da l'onn da scola 25/26.
