Scolastas e scolasts grischuns vesan il senn da lur lavur e lavuran gugent cun ils uffants e giuvenils. Plinavant surpiglian els ed ellas er gugent responsabladad. Quai mussa il studi da la Magistraglia Svizra, sco la Magistraglia Grischun scriva en ina communicaziun. Il studi è gia vegnì publitgà ils 8 d'avust, uss è vegnida publitgada l'evaluaziun da las cifras grischunas.
Il studi mussa era che mintga terz scolast u scolasta studegia da bandunar la professiun. E quai saja insatge problematic, uschia Nora Kaiser, la presidenta da la Magistraglia Grischuna. Plinavant veglia mintga quart scolast u scolasta grischun reducir il pensum.
La Magistraglia Grischun vesa la revisiun planisada da la lescha da scola sco schanza per il futur. I dovria in svilup per far frunt a las extradas che smanatschan e dad impedir che la qualitad vegnia mendra en scola. Latiers tutga tenor la Magistraglia Grischun er dad adattar las pajas. Quellas na sajan betg adattadas al temp, uschia Nora Kaiser.
Pli baud stuevan ins far in'autra educaziun per vegnir mussadra da scolina. Uss dovra mintg'in in bachelor. La paja dad oz è dentant memia bassa per persunas cun in bachelor.
La paja na saja dentant betg tut. Ils scolasts e scolastas pretendan oravant tut
- dapli temp en general
- dapli sustegn professiunal
- dapli temp per coordinar la lavur tar mesiras integrativas
- bunas cundiziuns da basa per classas eterogenas
La raschun che blers scolasts e scolastas vulan bandunar la professiun saja tranter auter er che las resursas manchian – quai per promover individualmain ils uffants. Uschia pretenda la Magistraglia Grischun da distgargiar scolastas e scolasts, uschia ch'ellas ed els hajan puspè dapli temp da sa concentrar sin il dar scola.
