Pervia dals ferms urizis e la plievgia da la fin d'emna èn differentas bovas vegnidas a val en il chantun. Persunas han stuì vegnir evacuadas. Ina persuna è vegnida blessada.
-
Bild 1 von 4Legenda: La via dal Pass dal Flüela è curclada. MAD -
Bild 2 von 4Legenda: En Val Tumleastga è grippa e crappa vegnida a val. MAD
-
Bild 3 von 4Legenda: Er la via da Stampa è stada pertutgada da las malauras. MAD
-
Bild 4 von 4Legenda: La bova a Zernez ha donnegià in auto e curclà la via. MAD
Valsot
Era en la vischnanca da Valsot hai dà gronds donns pervia d'in urizi. En la Val d'Assa sur Ramosch è vegnida giu ina gronda bova cun bler material. Tenor retschertgas da RadioTelevisiun Svizra Rumantscha ha il material stagnà l'En - uschia ch'i è sa furmà in lai. L'aua ha sin quai tschertgà in'autra via tras in prà. Quant gronds ch'ils donns èn n'èn anc betg enconuschent.
Pass dal Flüela
Sonda saira enturn las 17.30 è ina bova ida a val sin la via dal Pass dal Flüela. La polizia ha stuì serrar per pliras uras la via tranter Tavau e Susch en omaduas direcziuns. Plinavant è ina dunna sin in moto sa blessada levamain. Quai pervia d’in crap ch’è vegnì a val.
Scuol
Plinavant han pliras bovas procurà per donns ed impediments en la vischinanza da Scuol. En spezial è la val laterala Val S-charl pertutgada.
Val Tumleastga
Sonda saira suenter las 20 uras è vegni giuadora crappa tranter Almens e Scharans en Val Tumleastga. L’uffizi forestal ha stimà la quantitad da crappa ch’è ida a val sin 10’000 enfin 15’000 meters cubic. Ord motivs da segirtad èn tut las sendas en questa regiun vegnidas serradas. Tutgà da crappa n’è dentant nagin vegnì.
Stampa
Era ord da la regiun da Stampa ha la polizia chantunala survegnì annunzias da bovas sonda saira suenter las 21 uras. Ina bova ha cuvrì la via principala da Stampa en il territori da La Palü. E quai sin ina lunghezza da bun 100 meters. In auto parcà e vegnì donnegià. La via è stada serrada enfin dumengia la bun’ura..
Zernez
Er la regiun tranter Ova da Spin e La Drossa a Zernez è pertutgada da las malauras. La via dal Fuorn è stada bloccada e cuvrida en plirs lieus. Ella è dentant puspè averta dapi dumengia la bun’ura.
Cuira
Suenter in grev stemprà a Cuira la dumengia saira hai dà plirs telefons tar la polizia. Quella ha stuì ir pervi d'abitaziuns e tschalers innundads ma er pervi d'ina planta derschida. Ultra da quai sajan la polizia ed ils pumpiers vegnids clamads perquai che vias e sutpassadis sajan stads sut aua, scriva la polizia da la citad.
RR novitads 12:00