Concret vul quai dir: sche las cundiziuns èn ademplidas, lura sto il chantun dar ina lubientscha per il parc solar a partir dal prim da settember. La Confederaziun na sto betg approvar la lubientscha da bajegiar. La Confederaziun sto dentant approvar ils implants electrics (lingias da colliaziun, implants da transfurmaziun, indrizs da bassa tensiun etc.). Dentant sco tar mintga lubientscha da construcziun èsi pussibel d'inoltrar recurs.
Gia l'entschatta dal fanadur aveva il chantun publitgà las lingias directivas en connex cun las premissas, las proceduras e las dumondas da construcziun per ils implants solars. Quest mussavia cuntegna tut las chaussas interessantas per las petentas ed ils petents (las gestiunarias ed ils gestiunaris dals implants), las vischnancas (sco organ approvant e sco autoritad) ed er per las autoritads chantunalas (cooperaturas e cooperaturs sco er autoritad che conceda las permissiuns da construcziun) tant areguard las premissas da la permissiun sco er areguard las proceduras da permissiun.
En il Grischun èn actualmain passa 20 projects per ovras solaras sin maisa che vulan subvenziuns da la Confederaziun.
Adattà al tema
L'atun passà ha il parlament svizzer decidì in’offensiva solara. Dapi lura èn vegnids preschentads plirs novs projects per implants solars. Betg da smirvegliar. I spetgan subvenziuns federalas da fin 60% dals custs d'investiziun. Ils Cuntrasts sa dumondan: Fan implants solars gronds insumma senn en las Alps? Tgi gudogna, tgi perda? E tge fissan alternativas?
