Ina giuria internaziunala cun 48 commembras e commembers ha ludà la qualitad dal design ed il concept cumplessiv da l’uschenumnada arena dad info tar il plazzal da fabrica a Preda. Cun quell’arena dad info vul la Viafier retica infurmar durant la refabrica dal tunnel da quel project grond.
L’arena è vegnida creada dals dus ateliers Erlebnisplan a Lucerna e da l’atelier per scenografia ed architectura Frank Dittmann a Turitg.
Il German Design Award è in dals pli renumnads premis internaziunals per trends en il design. Sin sia pagina en la rait scriva l’organisaziun che quest onn sajan vegnids inoltrads 4’000 projects e products da 50 pajais. La giuria ha attribuì en 48 categorias 45 premis d’aur e 361 projects èn vegnids menziunads sco «Winner».
La surdada dal premi è ils 10 da favrer 2017 a Frankfurt.
RR novitads 11:00