La Caritas Grischun sustegna persunas cun in pitschen budget. En la stizun da la Caritas a Cuira po la glieud ir a far cumissiuns fin 70% pli bunmartgà. I dovra per quai la carta da «KulturLegi». Quella pon ins retschaiver sch’ins sa demussar cun ils documents da taglia ni attests da paja ch’ins dovra agid.
Fin l'onn 2021 sustegnevan la citad da Cuira e la vischnanca da Domat quest project cun daners. La carta era lu sulet èn quellas duas vischnancas valaivla. Grazia a la fundaziun Dr. Stephan à Porta da Turitg pon uss persunas da l’entir Grischun profitar da la carta da «KulturLegi». Uschia è il dumber da persunas creschì da 1'350 persunas sin 2'600 persunas.
Gratuitamain cun la Viafier retica e l’Auto da posta
Uss pon las possessuras e possessurs da la carta ir gratuitamain a Curia cun la Viafier retica e cun l'Auto da posta da l’entir Grischun. Il motiv: be a Cuira porscha la Caritas Grischun ina stizun cun ina vasta purschida da victualias e rauba dal mintgadi cun pretschs bunmartgads. E la purschida duai esser per tuttas e tuts accessibla. Ed a Cuira saja era l’anonimitad pli gronda ch'en ina vischnanca pitschna.
Ils motivs daco che glieud croda en povradad e pitgiras èn fitg differents. Era sche las cartas da la Caritas èn fitg dumandadas è il dumber da las persunas che dovran agid dal Servetsch social dal Grischun restà stabil. Corona e l’inflaziun hajan betg chaschunà dapli dumondas per sustegn. Ils ultims onns saja quai dumber restà stabil cun radund 2'500 dumondas d’agid finanzial.
