Nino Schurter daventa partenari da Grischun Vacanzas. Quai ha communitgà l’organisaziun turistica. Dal 2021 fin il 2023 fetschia il mountainbiker da Tersnaus reclama per la campagna «Fairtrail Grischun».
En la campagna «Fairtrail» giaja per ina convivenza paschaivla tranter velocipedists e viandants. La campagna duai sensibilisar giasts ed indigens. Meds da la campagna èn tranter auter videos, placats ed inserats en las medias. Tenor il CEO da Grischun Vacanzas, Martin Vincenz, è Nino Schurter l'ambassadur ideal per exprimer la tenuta da «Fairtrail».
Uss tuttenina bain – avant dus onns anc betg
Avant dus onns aveva gist il cuntrari procurà per lingias grassas: Il fatg che quellas dus partidas avevan betg collavurà. Nino Schurter aveva fatg reclama per la regiun turistica da Lugano e Grischun Vacanzas aveva collavurà cun in mountainbiker da la Scozia. Uss hajan las dus partidas dentant chattà in tema ideal per collavurar e perquai saja quai uss finalmain reussì.
