Per l'onn 2025 budgetescha la regenza grischuna in deficit da 90,5 milliuns francs. Quai è prest il dubel dal minus budgetà per il 2024. Sco la regenza communitgescha, haja la reducziun dal pe da taglia per 5% per l'emprima giada effect il 2025. Il budget 2025 saja per gronda part en urden – il sulet punct problematic saja che las expensas creschian memia fitg.
Per il 2024 ha il chantun budgetà in minus da prest 47 milliuns francs. Il mument parta la regenza dal fatg ch'i dettia in plus da radund 50 milliuns francs. Las cifras definitivas vegnan preschentadas il mars 2025.
Expensas creschan per 5,1%
Il favrer ha il Cussegl grond definì otg valurs directivas per la politica da finanzas. Il budget dal 2025 resguarda set da quellas valurs. Sulettamain la quota statala dal chantun («kantonale Staatsquote») na vegn betg resguardada. Tenor questa valur dastgan las expensas dal chantun be crescher real en media per 1%. Ils onns 2020-2025 è quella creschida en media per 1,8% per onn – pia memia fitg.
Il 2025 quinta il chantun cun in augment da las expensas da 5,1%, quai cumpiglia las expensas e las investiziuns bruttas.
Dapli investiziuns
Il chantun vegn puspè ad investir dapli l'onn proxim. Las expensas d'investiziun planisadas per il 2025 èn tar 525,4 milliuns francs, per il 2024 èn planisads 482,6 milliuns francs, l'onn 2023 eran quai 451,2 milliuns francs. Tranter auter èn bunamain 40 milliuns planisads per la construcziun da la nova Scola auta spezialisada a Cuira. Plinavant dat il chantun ora passa 28 milliuns per projects d'IT.
Deficits creschents dal 2026 fin 2027
Il favrer ha il Cussegl grond definì novas valurs directivas per la politica da finanzas. Tranter auter duess vegnir duvrà agen chapital per cumpensar la reducziun dal pe da taglia, per las autas investiziuns e per cumpensar la mancanza da contribuziuns da la Banca naziunala. Entras quai na vegnian las pussaivladads da spender daners per expensas regularas dal chantun betg limitadas.
Per ils onns 2026 e 2027 quinta il chantun cun deficits da 118, respectivamain 137 milliuns francs. Las entradas na s'auzian betg, i dettia dentant adina dapli expensas, scriva il chantun. Ils deficits sajan memia auts – en vista a las valurs directivas – perquai che las expensas creschian memia fitg. Il chantun stoppia perquai tegnair mesira cun ulteriuras fatschentas che muntan expensas supplementaras.
Il Cussegl grond vegn a tractar il preventiv 2025 en la sessiun da december.
Reacziuns da deputads e deputadas sin il minus da 90 milliuns francs
Questa sessiun è vegnì discutà davart la cultura – era proxima sessiun en december vegn quai puspè ad esser tema. Alura dentant en il rom dal budget. Il chantun Grischun ha budgetà in minus da 90 milliuns francs per l’onn 2025. Ch’il chantun budgetescha in minus n'è nagut nov – ils ultims 15 onns ha el fatg quint cun in minus e la fin finala adina fatg in gudogn.
Maurizio Michael da la Partida libereldemocratica vesa il minus per il 2025 dentant sco pussaivel. Il deputà dal Cussegl grond di, ch’el pensa ch'i dat ina cifra cotschna, forsa betg uschè gronda co budgetà. Auter vesa quai Beatrice Baselgia da la Partida socialdemocratica: Ella è anc betg persvasa che quai vegn a dar in minus. Ed era sch'i dess in minus na fiss quai betg uschè tragic – causa ils raps ch’il chantun Grischun haja da la vart. E tenor Nora Saratz Cazin dependi da divers facturs. Tranter auter las taglias u sche la Banca naziunala nvizra dat ina contribuziun al chantun. Il 2022 ha il chantun Grischun anc survegnì 92,4 milliuns francs, il 2023 nagut. In effect sin quest minus dal budget savess era avair la decisiun dal Cussegl grond da reducir las impostas.
Walter Grass da la Partida populara svizra è anc adina d’accord cun questa decisiun e na vul betg discurrer da culpa. Kevin Brunold dal Center Grischun era adina cuntent cun ils plus ch’il chantun ha fatg en ils ultims onns. Per l'onn proxim hajan era las finanzas da la Confederaziun in’influenza, di il deputà. Numnadamain ha era la Confederaziun plans da spargn ed i saja impurtant che la Confederaziun na dettia betg giu custs al chantun ed il chantun alura a las vischnancas. Il budget da 90 milliuns francs minus vegn discutà en la sessiun da december.
