La citad da Cuira ha fatg l’onn passà in surpli da 23,7 milliuns francs. Quai tar entradas da bunamain 298 milliuns francs. Cun quest resultat surpassa la citad il preventiv per passa 13 milliuns ed il resultat da l’onn avant per 10 milliuns francs. Cunzunt sajan las entradas da taglia stadas pli autas che previs, ha communitgà la citad da Cuira.
Trasfurmaziun da la Gevag ha sustegnì il bun resultat
L'implant per arder rument Gevag, purtà principalmain da las vischnancas vischinas, è vegnì transfurmà en ina instituziun dal dretg public. Questa midada haja purtà a la citad bunamain 15 milliuns francs. Ultra da quai saja er stà pussaivel da reducir ils custs da persunal. L'agen chapital da la citad da Cuira saja s'augmentà dapi il 2015 per 150 milliuns sin 641 milliuns francs.
