La regenza grischuna ha approvà la construcziun dal tunnel da drenascha per Brinzauls. La Confederaziun ed il chantun han empermess ina contribuziun da 90% dals custs che muntian a bunamain 40 milliuns francs. Las lavurs preparatoricas per quest tunnel cumenzan gia il settember.
Tras la construcziun d’in tunnel da drenascha duajan vegnir quietads ils moviments dal terren da la bova «Vitg» e las massas da grip instabilas da la bova «Muntogna».
En la vischnanca d'Alvra vegn il project sustegnì fermamain. Gia ils 14 da fanadur 2023 ha la radunanza communala approvà il credit brut da 40 milliuns francs senza cuntravuschs.