L'avust 2017 sutterran 3 milliuns meters cubics crappa parts da Bondo. La crappa vegn giu dal Piz Cengalo, va tras la Val Bondasca e riva en vischnanca. Otg viandantas e viandants ch’eran da viadi tras la val moran tar la tragedia.
Oz, dapli che set onns pli tard è la bova anc adina preschenta tar la cussegliera naziunala Anna Giacometti ch’era da quella giada presidenta da la vischnanca da Bregaglia.
Ella è ina da tschintg persunas ch’èn accusadas pervi da mazzament per negligientscha. Il cas è pendent tar la dretgira regiunala Malögia. La procedura è atgnamain stada planisada per l'ultim quartal da quest onn. Pervia da differentas circumstanzas è il process vegnì spustà sin l'onn che vegn. Quai ha la dretgira communitgà l’entschatta d’october.
L’emna passada ha Anna Giacometti dentant survegnì posta: «La dretgira scriva ch’ella vul uss dapli documents da la vischnanca e dal chantun.»
Dapli na vul la cussegliera naziunala da la Partida liberaldemocratica betg dir il mument davart il cas causa ch'i sa tractia d’ina procedura currenta. Ella fa però attent, che la procedura n’ha nagina influenza sin la lavur parlamentara a Berna.
Il podcast politic. In sguard davant e davos las culissas da la politica naziunala.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
L'entira emissiun Controvers: