Ins avess stuì serrar preventivamain las sendas. Uschia avess'ins tut tenor pudì evitar la mort d'otg persunas. A quella conclusiun vegn la procura publica sin basa d'in rapport independent che las parentas ed ils parents da las unfrendas han laschà far in geolog.
Uss sto la dretgira regiunala Malögia en chaussa decider sche tschintg persunas han agì cun negligientscha. La procura publica renfatscha d'avair valità fauss la situaziun da segirtad. Quai scriva il «Beobachter». Sin dumonda da RTR scriva l'Uffizi da guaud e privels da natira dal Grischun ch'ins prendia per enconuschientscha l'accusaziun. Ed il chantun haja grond interess che la dretgira sclereschia bainspert il cas en l'interess da tut ils pertutgads.
Il geolog independent è da l'opiniun ch'igl haja dà divers indizis ch'han annunzià la bova e la ristga saja stada inacceptabla. Accusads d'avair decidì fallà en quella situaziun èn collavuraturs da l'Uffizi chantunal da guaud e privels da natira, la presidenta communala da Bondo da lezzas uras e cussegliera naziunala Anna Giacometti ed in'ulteriura persunas tschentada en da la vischnanca da quai temp.
Ils collavuraturs dal chantun ha crititgà ferm il rapport independent. Tenor els saja per gronda part mintgin sez responsabel per sia segirtad sin questas sendas, e la ristga na saja betg stada inacceptabla. Plinavant giajan las opiniuns dapart, tge che valia sco indizi per ina bova, e tge betg. Per las persunas accusadas vala la presumziun d'innocenza.
Gia il 2019 aveva l'uffizi renvià las renfatschas, e la procura publica grischuna aveva terminà sias investigaziuns en chaussa. Davant il Tribunal federal han las parentas ed ils parents dentant cuntanschì, ch'ella sto puspè prender si las investigaziuns.
Or da l'archiv
