Malgrà ils gronds auts gudogns. En il mument survegnan clientas e clients da la Banca chantunala grischuna 0.3% tschains sin il conto da spargn. Daniel Fust, CEO da la BCG, manegia ch'i vegnia probabel anc a dar in augment, dentant betg in marcant. Era tar autras bancas è quest tschains bass.
La banca chantunala ha fatg l'onn passà in gudogn da record da 207,5 milliuns francs – in plus da 2,3% cumpareglià cun l'onn 2021. Quai ha communitgà la banca. Quest bun resultat saja grazia al bun onn d'investiziuns dal 2021. L'onn da gestiun 2022 ha la banca pudì augmentar danovamain il gudogn cun la fatschenta da credit e da deposits.
Daniel Fust, CEO da la BCG, focussescha per analisar il resultat cunzunt la prestaziun dal commerzi:
Nossa fermezza d'acquisiziun è remartgabla. Las unitads commerzialas han acquirì in volumen da fatschenta da 2,9 milliardas francs.
Cun acquists supplementars saja reussì ad els d'amplifitgar il volumen da la fatschenta per 6,2 milliardas francs.
Chantun ed investiders profiteschan
Da quest resultat profitescha er il chantun Grischun – quel survegn 92,8 milliuns francs. E las investidras ed ils investiders survegnan ina dividenda da 42 francs e 50 raps per scrit da participaziun.
Bunas prognosas per quest onn
Las prognosas per l’onn current sajan positivas. La BCG quinta quest onn cun in gudogn da radund 210 milliuns francs. La banca chantunala quinta che la Banca naziunala svizra augmentia vinavant a moda moderada il tschains directiv. En pli quinta la BCG cun ina leva schluccada tar l'inflaziun.
