La fin fanadur ha la Hamilton avertì lur collavuraturs e collavuraturas da betg baiver l'aua da spina da Domat pervi da valurs memia autas da restanzas dal pesticid clorotalonil-metabolit.
La vischnanca ha sinaquai instradà diversas mesiras, tranter auter laschà analisar l'aua d'in labor extern. Questas mesiraziuns mussan ussa ch'il cunfin tenor lescha da 0,1 microgramm/l na vegn betg surpassà. L'entschatta avust hajan ins fatg numerusas mesiraziuns, cunzunt en las parts abitadas. Tar tut las mesiraziuns sajan las valurs dal pesticid stadas sut 0,02 microgramms/l. Quai muntia ch'i saja bain avant maun insatge, ma uschè pauc ch'ins na possia gnanc inditgar la concentraziun.
Dapi lura fa la vischnanca mintga mais mesiraziuns ed ils resultats vegnan era publitgads directamain sin la pagina da la vischnanca.
Aua or da duas funtaunas da funs ed ina da culm
Actualmain retira Domat l'aua da baiver da duas ovras da pumpar aua da funs: las ovras Bagliel e Plarenga, ed ina funtauna da muntogna. L'ovra Plarenga aveva en il passà magari valurs pitschnas da clorotalonil-metabolit sur il cunfin che vala en Svizra. Perquai che Domat maschaida però l'aua da tut las funtaunas, na sajan las valurs mai stadas in privel per la la sanadad. Suenter las mesiraziuns da la Hamilton dal fanadur aveva la vischnanca supplementarmain reducì il quantum d'aua or da l'ovra Plarenga ed auzà quel da l'ovra Bagliel.
Raschuns per las valurs pli autas datti tenor la vischnanca diversas: Per ina il quantum d'aua or da l'ovra pertutgada, e per l'autra saja era pussaivel che dapli restanzas dal pesticid sajan vegnidas or dal terren pervi da la plievgia intensiva il cumenzament da la stad.
Problem liquidà cumplainamain a partir dal december
Sco ulteriura mesira ha la vischnanca da Domat instradà ina colliaziun cun la rait dad aua da la vischnanca vischina da Tumein. Quella duess esser pronta fin il december 2024 e furnir en l'avegnir 60% da l'aua da baiver per Domat. Ensemen cun l'aua or da la funtauna da culm (20-30%) ed ina pitschna part da l'ovra d'aua da funs Bagliel fiss il basegn cuvert. Uschia pudess la vischnanca prender da la rait l'ovra Plarenga ch'ha adina puspè mussà valurs lev pli autas ubain salvar ella sco reserva per aua da stizzar.
In tant malsegirtad e sceptica restan
Quella tematica procura era tar la populaziun per fermas emoziuns. Intgins n'eran betg cuntents cun la communicaziun da la vischnanca. La vischnanca n'haja gea mai infurmà sezza – pir cura che la Hamilton haja communitgà, saja quai stà in tema, dat da ponderar ina abitanta da Domat. Plinavant resta ina tscherta sceptica era davart las mesiras. Quellas na tanschian tenor la populaziun betg per garantir la qualitad da l’aua.