Art en il Grischun - Museum d'art: Program annual 2025

L'uniun grischuna d'art è vegnida fundada l'onn 1900 e festivescha uschia l'onn proxim ses 125avel giubileum. Questa fundaziun é tenor il directur artistic dal museum, Stephan Kunz, er stada la basa per il museum d'art.
Per l'onn da giubileum ha il museum d'art prendì avant intginas attracziuns per ses nov program annual: novas exposiziuns d'artistas e d'artists enconuschents e main enconuschents, referats, simposis, guidas ed en spezial ina festa da giubileum.

In punct dal program è l'exposiziun da giubileum «Davent da qua». En il focus da quella n'èn betg mo ils puncts culminants da la collecziun, mabain er las acquisiziuns dals ultims onns. In'attenziun speziala dat l'exposiziun a las perspectivas per l'avegnir: «Davent da qua» na stat betg mo per las ragischs localas, vul mabain er mussar en tge direcziun che la collecziun dal museum sa lascha amplifitgar.

Er l'Uniun grischuna d'art ha lantschà in'ediziun da giubileum: Ella ha envidà diesch artistas ed artists da crear in'ediziun da giubileum speziala. Las ovras vegnan alura preschentadas durant in mais en il labor dal museum.

L'exposiziun annuala tradiziunala è per ina giada deditgada ad in tema che serva sco motiv directiv per l'entir onn da giubileum: «À table» – sco invitaziun a la festa. Cun ina publicaziun uffiziala vegnan artistas ed artists dal Grischun envidads da proponer u da sviluppar ovras davart quest tema particular. Sco per mintga exposiziun annuala vegnan las inoltraziuns valitadas d'ina giuria externa spezialisada.

Sper questas exposiziuns pon ins l'onn proxim visitar ulteriuras: dad Augustas Serapinas, Leiko Ikemura, Noemi Pfister u Diego Giacometti. L'ultim è il frar dad Alberto Giacometti e - per il mument - anc pauc enconuschent per sias atgnas ovras.

Ovras el museum d'art Grischun

Il punct culminant da l'onn da giubileum è la festa da giubileum che ha lieu ils 28 da zercladur 2025. Er là vala il motto «à table», sco Stephan Kunz di: