Al puls da l'Agrischa - Amez la vita purila en la citad veglia da Cuira

Strusch ch'ella ha cumenzà è l'Agrischa 2025 puspè a fin. Var 40'000 persunas han tenor la Polizia da Cuira visità la fiera en la chapitala. Il president dal comité d'organisaziun, Hanueli Salis, sa mussa fitg cuntent. I n'haja dà nagins incaps u accidents, il concept da traffic cun bus da shuttles haja funcziunà bain. Plinavant hajan ins survegnì blers resuns positivs.

Normalmain ha l'Agrischa lieu en regiuns pli ruralas, sin in prà e pli ordaifer ils centers. Quest onn eran ils stans, las exposiziuns d'animals e las maschinas d'agricultura amez la citad. Las visitadras ed ils visitaders han reagì en moda fitg differenta sin quai.

In dals lieus principals era la plazza dal teater. Là era il lieu d'inscunter «agricultura» cun differentas attracziuns e tenda da festa. Ultra da quai era er la plazza da Nikolai centrala. Davant la chasa da scola Nikolai al ur da la citad veglia hai numnadamain dà in'exposiziun da razzas da vatgas-mamma.

L'organisatur da la tenda «vatgas-mamma» Lucas Casti ha tradì ch'igl n'era betg simpel da vegnir cun tut las vatgas en la citad. Ma ils resuns da la glieud sajan stads fitg positivs, di l'um giuven cun egliers da sulegl sin il chau.

Sin la giassa sut e sura era ina fiera cun products locals sco chaschiel, charn, latg, ma er products da lain. Questa giassa s'extenda tras la part sura da la citad veglia da Cuira. Era l'Arcas era plain glieud la sonda – là ha numnadamain gì lieu il campiunadi da bucs. Ultra da quai pudevan las visitadras ed ils visitaders vegnir en contact cun chauras e nursas.

Impressiuns da l'Agrischa

Sin la plazza da Martin, gist dasper l'Arcas, ha gì lieu l'olimpiada da famiglias. Quai èn differentas concurrenzas per persunas da mintga vegliadetgna. In zic davent da la citad veglia, en la halla da la citad, è l'exposiziun da muvel da latg. Ultra da quai ha gì lieu la concurrenza Miss Agrischa, nua ch'i vegn tschernida e curunada la pli bella vatga.

Ma betg tut las vuschs èn positivas davart il lieu. Tscherts visitaders chattan donn che l'Agrischa n'ha betg lieu sin in prà.

La dumengia a las 16:00 è la festa e faira d'agricultura lura gia stà a fin. Subit han cumenzà las lavurs da rumida. Fin la saira a las 20:00 uras sto tut esser rumì, uschia ch'il traffic tras la citad po puspè charrar sco usità.