Sco ch'il president dal comité d'organisaziun Hanueli Salis ha ditg envers il schurnal regiunal da SRF, ha el gia ina clera idea co ch'i duai vesair ora ils 12 e 13 d'avrigl a Cuira: Vatgas davant la chasa da scola Nikolai, nursas e chauras sin l'Arcas e chavals sin la Grabenstrasse.
Organisar l'Agrischa ina giada en la citad, quai saja gia daditg ina finamira, di Hanueli Salis. Las ultimas emnas hajan els dentant sentì ch'i n'è gnanc uschè simpel da realisar questa occurrenza amez la citad veglia da Cuira. Els n'han numnadamain betg l'entira emna temp da bajegiar si, sco en auters lieus. E pervia dal traffic ed il mintgadi en la citad sto tut ir fitg svelt.
La fin d'emna sezza, cura che l'Agrischa ha lura lieu, na vegni era betg pli simpel per ils organisaturs.
La gronda sfida vegn ad esser l'exposiziun da muvel tar la halla da la citad – qua vegni ad avair blers animals e bler traffic cun tractors.
Per ils animals èsi ina fin d'emna nunusitada. Tenor l'Uniun da protecziun d'animals dal Grischun duess ins guardar, ch'i dettia avunda ruaus per ils animals. La presidenta Tina Gartmann ha ditg envers il schurnal regiunal dad SRF, ch'i po stressar ils animals, sche blers umans esters als tutgan.
Persunas estras èn in stress per ils animals, ed ord vista da la protecziun dals animals na duess quai propi betg esser.
Era l'Uniun svizra per la protecziun dals animals ha gia crititgà l'Agrischa ina giada. L'onn 2019 a Zernez n'hajan ils animals numnadamain betg gì avunda paus, e sajan stads disturbads memia fitg da las visitadras e dals visitaders.
Er il president dal comité d'organisaziun Hanueli Salis è da l'avis, ch'ils animals dovrian avunda ruaus. «Ils animals dovran in lieu da retratga», di el. Ina idea saja per exempel da laschar ir la glieud durant ina mes'ura tar ils animals, e bloccar alura puspè la via.
Tenor la presidenta da l'Uniun per la protecziun dals animals Tina Gartmann è quai in pass en la dretga direcziun. I saja dentant anc megler, chatta ella, sche la glieud na pudess en general betg ir memia datiers als animals.
Preparaziun per l'Agrischa
En in'emna èsi uschè lunsch – l'exposiziun d'agricultura Agrischa vegn ad avair lieu en la citad veglia da Cuira. Tenor il president dal comité d'organisaziun hai in simpel motiv pertge ch'els han elegì quel lieu. «Nus vulessan render pli enconuschent l'agricultura a la glieud da la citad», di el.
Perquai che l'Agrischa ha lieu questa giada amez la citad veglia èn las preparativas er tut autras. En la citad veglia n'hai ni pastg ni fain – tut quai sto vegnir transportà en la citad.
Qua stuain nus emprim ina giada chargiar fitg bler strom en la citad per ch'ils animals possian star giu patgific.
Ultra da quai dettia era bleras reglas ch'els stoppian respectar, di el vinavant. Ils animals dovran per exempel plazza avunda e las visitadras ed ils visitaders ston esser segirs. Tuttina è Hanueli Salis persvadì dal program da l'Agrischa. «Quai daventa ina vaira festa da l'agricultura», di el. Per el vali pia la paina, malgrà tut las difficultads.
Or da l'archiv: