Per in onn è Franz Sepp Caluori il pli aut Grischun. Sia patria, la citad da Cuira ha perquai envidà ad ina festa la sonda e quai a Haldenstein che tutga er tar Cuira. En il curtin dal chastè èn politicras e politichers s'inscuntrads cun la populaziun ed er cun la prominenza grischuna – e quai da fina bell'aura. Silsuenter hai dà per ils giasts envidads in gentar, musica e blers pleds divertents. Tradiziun tar la festa dal pli aut Grischun è ch'i vegn en ils pleds dà en las costas in a l'auter.
-
Bild 1 von 8Legenda: Franz Sepp Caluori pronts per il til tras la citad. RTR -
Bild 2 von 8Legenda: Il viadi a Haldenstein sut l'ensaina da Franz Sepp Caluori . RTR
-
Bild 3 von 8Legenda: Inscunter en il curtin dal chastè a Haldenstein. RTR
-
Bild 4 von 8Legenda: Tuts han tschertgà l'umbriva durant l'apero. RTR
-
Bild 5 von 8Legenda: Franz Sepp Caluori durant ses pled. RTR
-
Bild 6 von 8Legenda: Il menu da festa dal pli aut Grischun e pli aut gastronom. RTR
-
Bild 7 von 8Legenda: S'inscuntrar cun il pli aut Grischun. RTR
-
Bild 8 von 8Legenda: Mintga fracziun ha fatg in pled – qua la Allianza dal Center. RTR
Caluori è deputà da l'Allianza dal Center e sesa dapi il 2014 en il Cussegl grond. El è gastronom e president da l'uniun Gastro Grischun. Caluori succeda a Tarzisius Caviezel da la Partida liberaldemocratica.
Il Cussegl grond elegia tradiziunalmain l'emprim di da la sessiun d'avust sia nova presidenta u nov president. L'elecziun succeda en in turnus tranter las partidas. L'ultim di da la sessiun datti lura ina festa per il nov elegì pli aut Grischun.
En ses onn presidial na veglia el betg mo esser preschent en l'agen chantun. El veglia er visitar ils chantuns vischins e far reclama per il Grischun. Er manar la politica pli datiers a la populaziun saja ina finamira.
En il parlament veglia el surtut guardar che las formalitad vegnan tegnidas en. Quai haja il davos onn – er grazia a bleras novas persunas en il parlament – mancà mintgatant.
Silvia Hofmann è vicepresidenta
La deputada da la partida socialdemocratica Silvia Hofmann è vegnida elegida cun 107 da 109 vuschs valaivlas sco vicepresidenta dal Cussegl grond. Ella vegn a sustegnair Franz Sepp Caluori da manar las debattas. Hofmann è dapi il 2018 deputada ed è experta per dumondas d'egualitad. Sco il nov president è er Silvia Hofmann da Cuira.