Igl è stà october 2019 cura ch’il telefon ha scalinà tar la famiglia Greiner a Sta. Maria. Milena Greiner (37), ch’aveva gist visitas dals nevs, era tut perplexa. «Nus avain in mat per vus», avevi num al telefon. In telefon, che ha laschà ir il siemi d’adopziun da la famiglia Greiner, che na pudeva betg survegnir uffants sin via natirala, en vigur.
Jau vai tramess mes nev per clamar mes um Gabriel da lavur. Cura ch’el è arrivà vai jau mo ditg: ‘Ti daventas finalmain bab!'
I na vul betg funcziunar
Dal 2012 aveva la famiglia, bain savend ch'i vegnia difficil, empruvà da survegnir in uffant sin differentas vias. Dal 2016 lura la capitulaziun e l’emprima ponderaziun d’adopziun. Pir dus onns pli tard, dal 2018, s’èn Milena e Gabriel Greiner (44) decidì definitivamain per in’adopziun. Suenter la fasa da qualificaziun tar l’uffizi dal servetsch social grischun è la famiglia arrivada sin la glista da spetga il favrer 2019.
Gia l’october 2019 ha scalinà il telefon. Il giuven Pietro da Turitg – el aveva da quel temp in zic dapli ch’in mez onn – e vegnì selecziunà per la famiglia Greiner. Sia mamma biologica aveva gì problems cun drogas, la decisiun da dar liber Pietro per l’adopziun era gia crudada durant la speranza. Il bab n’era betg enconuschent. Per la famiglia Greiner la gronda fortuna.
D’adoptar Pietro e stà il pli bel mument da mia vita
In process lung, senza garanzia sin success
Dapi ils onns 1980 sa reducescha il dumber d’adopziun en svizra cuntinuadamain. En la svizra tudestga hai dà tenor la «PACH» (Pflege- und Adoptivkinder Schweiz) dal 2024 15 adopziuns naziunalas.
Mammas, che tiran si l'uffant sulet na dattan ozendi betg pli davent in uffant savens. Ed er las metodas per multiplicaziun artifiziala èn avanzadas.
Sch’ins na resguarda betg cas d’adopziuns da figliastras e figliasters u adopziuns da creschids hai da en il grischun durant ils ultims radund tschintg onns, trais adopziuns. Adopziuns internaziunalas duain vegnir scumandadas en il futur uschè ch’i restan be anc adopziuns naziunalas. La schanza da pudair adoptar in uffant e pia fitg pitschna.
Plinavant è il process fitg persunal e dovra pazienza, declera Manuela Luzi dal post spezialisà per famiglias da tgira ed adopziun. Cun plirs formulars, extracts da registers penals e da scussiun, cun visitas a chasa e cun plirs discurs ston ins dar in’invista profunda en la vita privata als uffizis.
Ins sto metter l'entira vita privata sin maisa.
Sper l’uffizi dal servetsch social è quai la l’autoritad per la protecziun da l’uffant e da creschids (KESB) e l’agentura PACH. I po esser ch’ins spetga blers onns e ch’ins na po tuttina betg adoptar in uffant. La cumbinaziun tranter uffant e famiglia vegn fatga numnadamain tenor quant bain ch’i van ensemen e betg quant ditg ch’ina famiglia ha spetgà. Ch'i po dentant, cun in zic fortuna, era funcziunar mussa la famiglia Greiner a Sta. Maria. Il giuven Pietro cumplettescha la famiglia dapi passa 5 onns.