En Svizra vivan actualmain circa 702'000 umans en povradad. Ina persuna singula pertutgada da povradad ha in budget mensil da main che 2'300 francs, entant ch'ina famiglia cun dus uffants ha a disposiziun 4'000 francs. L'acziun porscha a las persunas pertutgadas da povradad en Svizra ina distgargia punctuala da lur budget da chasada, uschia ch'ellas pon era sa prestar autras chaussas necessarias.
Pussaivladads da far donaziuns
A partir dals 24 da december 2024 retschaiva la Posta svizra fin ils 18 da schaner 2025 gratuitamain pachets cun victualias conservablas ed artitgels d’igiena. Mintgin po contribuir activamain a l'acziun e pachetar sez in pachet. Ils artitgels donads duessan esser conservabels almain sis mais. En pli pon ins acquistar pachets da donaziun preparadas en tschertas filialas dal Coop ed er online. L’acziun vegn sustegnida da la SRG SSR, da la Posta Svizra, dal Coop e da la Crusch Cotschna Svizra. Ils artitgels dal basegn fundamental che vegnan donads vegnan repartids da la Crusch Cotschna Svizra en l'entira Svizra.
Succurs d'enviern a l'exteriur
A l'exteriur vegnan sustegnids cun ils daners da donaziun projects d'agid d'enviern en Armenia, Bosnia ed Erzegovina, Kirgistan e Moldavia. Quests projects sa drizzan oravant tut a gruppas periclitadas sco persunas attempadas, persunas cun impediments, persunas ch'educheschan sulettas e famiglias cun trais e dapli uffants. Il sustegn po esser tschaveras chaudas, pachets da vivonda u daners.
Il sustegn è reussì durant l'onn passà
L'onn passà ha la populaziun svizra demussà gronda solidaritad cun sustegnair passa 50'000 persunas en Svizra ed a l'exteriur. Las donaziuns rimnadas han gidà a meglierar la vita da bleras persunas basegnusas durant la stagiun fraida.
