Stefan Loppacher banduna l'uvestgieu da Cuira. Quai per la fin d'avust. El era dapi il 2019 incumbensà per la prevenziun. La raschun ch'el sa retira sajan differenzas quai che pertutga la prevenziun da l'abus sexual en la Baselgia catolica. Ensemen cun l'uvestg da Cuira, Joseph Maria Bonnemain, ha Stefan Loppacher fin uss realisà la lavur da prevenziun en connex cun l'abus sexual.
Sco quai che l'uvestg ha ditg envers RTR, saja Loppacher bain loial quai che pertutgia sia lavur sco incumbensà per la prevenziun, el haja però ina tenuta distanziada envers la Baselgia catolia. Ed el, l'uvestg, spetgia ch'in collavuratur sa mussia era loial envers la baselgia.
Uss ha Stefan Loppacher pia decis da bandunar l'uvestgieu da Cuira. En il futur vegn el a manar il nov post naziunal «Abus en il context ecclesiastic». Quest uffizi vegn realisà per incumbensa da las baselgias chantunalas, da la Conferenza dals uvestgs svizzers e da l'organisaziun da las cuminanzas dals urdens.
Avant in onn aveva gia Karin Iten – in'anteriura collega da lavur da Loppacher – bandunà l’uvestgieu. Era ella pervia da differenzas.
