La presidenta dal cussegl grond Aita Zanetti ha avert oz la sessiun d’atun. En ses pled d’avertura ha ella tratg parallelas cun l’atun sco stagiun e la situaziun da pandemia. I saja da as preparar sin l’enviern uschia che quel grategia tant per la societad sco er per l’economia. Sco ella ha ditg saja la sfida da turnar ad ina tscherta normalitad. Uschia valia quai la paina da metter sin la ballantscha ils ristgs e las schanzas.
Green Deal è tema da pais
Ils proxims trais dis stat cunzunt ina fatschenta en il center da la sessiun dal Cussegl grond: il Green Deal. La finamira da quest plan è da vegnir enfin il 2050 sin netto nulla quai che pertutga il CO2. En in'emprima etappa decidan las deputadas ed ils deputads davart in credit da radund 68 milliuns francs. Cun quel duain cunzunt mesiras gia existentas sco per exempel sanar bajetgs, remplazzar energias fossilas ubain promover il traffic public vegnir rinforzadas.
A lunga vista va quai dentant per en tut bunamain 1,8 milliardas francs ch'il Grischun duai investir en la neutralitad al clima. E cunquai che quai pudess er ir al suveran vid la bursa è ina discussiun en il parlament gia programmada. La regenza propona numnadamain d'auzar en il mender cas la taglia.
Spustar sinergia 2
Plinavant vul il Cussegl grond far ina midada en la strategia d'immobiglias. Il project sinergia 2, ch'avess gì da vegnir bajegià bainprest, duai vegnir spustà sin pli tard. Il motiv: cunquai che la dretgira administrativa e la dretgira chantunala duain vegnir messas ensemen tar ina nova dretgira superiura, duai sco emprim vegnir chattà per quella dretgira ina buna schliaziun. Previs è da metter ella en la Grabenstrasse nua che l'uffizi da construcziun bassa è per il mument. Lez stuess lura sviar en la Loestrasse.
Differentas dumondas ed incumbensas
Reto Crameri da l'Allianza dal Center pretenda da la regenza, ch'ella fetschia in plan d'acziun per las regiuns muntagnardas. Quel duai mussar co ellas pon vegnir anc pli attractivas. Corona haja numnadamain carmalà bleras persunas en il Grischun che giavischan d'abitar en ina regiun perifera, i dovria dentant er bunas circumstanzas per pudair far quai.
Lukas Horrer da la PS vul cun ina moziun dar dapli cumpetenzas a cumissiuns parlamentaricas (PUK) futuras. L'emprima PUK dal Grischun che ha examinà il cas dal whistleblower Adam Quadroni haja numnadamain betg dastgà interrogar anteriurs emploiads dal chantun. Respectivamain quellas persunas n'han betg stuì dar resposta. Quai duai sa midar en l'avegnir.
