Giuvens e giuvnas dad 11 enfin 18 onns pon passentar trais dis ad emna lur temp liber en il local da giuventetgna a Cuira. Là pon els s'inscuntrar cun lur collegas, dar gieus u organisar agens projects. I saja impurtant da pussibilitar quai als giuvenils, din Ngoc Beck, la responsabla per la purschida e Nick Marx, il manader da la lavur da giuventetgna Cuira. Ma senza mesiras da corona na va quai era tar els betg. Tranter 100 e 150 mats e mattas visitan mintg'emna il local.
Era sche Ngoc Beck ha il sentiment ch'ils giuvenils èn gia endisads bain vid la situaziun da corona, han els anc adina mintgatant miserias cun las restricziuns:
Els na portan betg gugent la mascrina. Dapli restricziun ch'i dat e pli pauc plaschair ch'els han.
Il mender saja dentant sch'els na possian betg s'inscuntrar cun lur collegas. Quai saja anc mender per els che per ils creschids, di Nick Marx. Il temp da la pubertad saja emplenì da bleras emoziuns, ed ils giuvenils hajan bler da discurrer in cun l'auter.
-
Bild 1 von 2Legenda: Il local da giuventetgna a Cuira – dentant be il provisoric. RTR, Carmen Monn -
Bild 2 von 2Legenda: Atgnamain sa chatta il local en l'auzada sura, ma perquai ch'els han las proximas emnas in'occurrenza da «trair chandailas» han els stuì dischlocar la stanza. RTR, Carmen Monn
Avant dacurt ha l'Associaziun tetgala da la lavur averta per uffants e giuvenils crititgà che quellas e quels sur 16 onns ston avair in certificat per far diever da la purschida. Mintgin haja il dretg da sa participar e nagin duai vegnir sclaus. En intgins lieus van pervia da l'obligatori da certificat bler pli pauc mats e mattas en ils locals da giuventetgna. Era a Cuira hai dà in svilup sumegliant. Dentant furman ils visitaders e las visitadras sur 16 onns mo ina pitschna part da l'entir public.
L'obligatori da certificat n'è betg ideal perquai ch'intgins vegnan sclaus dal local. Da l'autra vart pudain nus uschia pussibilitar in pau normalitad al rest dals visitaders.
Ils scolars e las scolaras sut 16 onns han enfin uss numnadamain pudì desister da la mascra e dal tegnair distanza en il local da giuventetgna.
Cun ni senza certificat – Nick Marx e Ngoc Beck speran da pudair porscher als giuvens ed a las giuvnas vinavant in bun temp en il local da giuventetgna a Cuira.