Ils giuvenils pon tras las mesiras da corona sa sentir dischorientads, esser senza motivaziun u sa chattar isolads. Cunzunt las mesiras sco il lockdown, il lavurar davent da chasa u la scola a distanza sajan las mendras per ils giuvenils, di Reto Mischol. Pertge uschia na possian els betg restar en contact cun lur collegas ed amis.
Disturbis da tema u da mangiar
Las giuvnas ed ils giuvens che tschertgian agid psicologic durant la pandemia, sajan dapli pertutgads da disturbis da tema u da mangiar u ch'els èn depressivs. Quai mussian era studis internaziunals, di il schefpsicolog da la psichiatria d'uffants e giuvenils a Cuira.
Cunzunt sch'ins na possia pervia da corona betg far las experientschas giavischadas sco per exempel ir en sortida u l'emprima giada persula en vacanzas, saja quai propi dir. I sveglia tar ils giuvenils il sentiment d'avair manchentà insatge ch'ins na po betg pli prender suenter.
Jau cussegl a tuts da mintgatant sa distanziar dal tema corona e sa concentrar sin tut las chaussas che nus pudain avair plaschair vidlonder.
Corona è preschent dapertut
Tras quai ch'ins haja stuì reducir ils contacts socials sajan blers giuvenils stads pli activs en las medias socialas. Quai saja ina buna moda per sa barattar cun amis e collegas. Da l'autra vart saja il tema corona e las differentas opiniuns era fitg preschent là. Quai procuria era per discussiuns intensivas entaifer la famiglia. Sco Reto Mischol di, saja quai era tar auters temas il cas, ma corona saja propi in tema fitg explosiv.
