La Swiss sto danovamain stritgar sgols u surlaschar quels ad autras societads aviaticas. La raschun sajan stretgas tar la segirezza da sgol en l'Europa, tar il persunal da terra e sin las plazzas aviaticas sin l'entir mund – uschia era tar la Swiss. I sa tractia dentant d'in pitschen dumber, scriva la Swiss. Tranter auter dettia
- davent da Genevra mintg'emna 5 sgols damain vers Londra,
- 1 sgol per emna damain da Turitg a San Franciso
- ed ils sgols da Turitg a Vienna surlascha la Swiss a la societad-sora Austrian-Airlines.
Gia l'avrigl aveva la Swiss stuì stritgar sgols per las medemas raschuns.
Gronda speranza suenter la pandemia
Suenter la pandemia ha la glieud bain puspè il desideri dad ir sin viadi. Quai sa mussa cun il grond dumber da viagiaturas e viagiaturs che las plazzas aviaticas en l'entira Europa han dumbrà sur ils dis da firà. Suenter avair stritgà plazzas durant la pandemia da corona chattan eroports sco er societads aviaticas però nagin persunal. Bleras da las anetiruras emploiadas ed emploiads han chattà plazzas en autras branschas.
Grev d'occupar nov persunal
Il minister da traffic tudestg avertescha d'ulteriurs problems, cura che las vacanzas da stad cumenzan. Pervi da las prescripziuns da segirezza – l'examinaziun da la fidaivladad – na pon novas collavuraturas e collavuraturs betg vegnir mess en dad oz sin damaun. Las autoritads d'approvaziun stoppian tschertgar schliaziuns ensemen cun ils patruns sin las plazzas aviaticas.
