L’unda da chalira en il sid dals Stadis Unids ha cuntanschì ier suentermezdi in ulteriur punct culminant. En il “Death Valley” en la California haja il termometer mussà 53,3 grads Celsius. Quai ha communitgà il servetsch meteorologic. Gia la sonda haja dà 51 grads. Il record da temperatura datescha dal 1913. Lura avev'ins mesirà bunamain 57 grads.
La fin d'emna hai dà a Bayern il record da temperatura per quai onn: 38,8 grads celsius han ins mesirà la sonda. La fundaziun per protecziun da pazientas e pazients pretenda pervia da quai dapli protecziun avant la chalira. Dapli che 25 grads celsius na duai esser lubì en chasas d'attempads.
40 grads e dapli en il sid da l'Europa
En la Grezia ed en l'Italia han las autoritads piglià mesiras cunter chalira extrema l'emna passada. La temperatura la pli auta en Grezia è fin uss 44,2 grads. En l'Andalusia, ina regiun da la Spagna, hai adina puspè dà temperaturas sur 40 grads.
Per quest'emna vegn prognostitgeschan servetschs da l'aura er per l'Italia autas temperaturas, il pli aut per la Sicilia (maximalmain 48 grads).
Las autoritads talianas quintan cun temperaturas sur 40 grads e cusseglian d'evitar da star directamain en il sulegl. La BBC scriva che las autoritads talianas hajan proclamà per 16 citads il pli aut stgalim d'urgenza pervia da chalira, tranter auter a Roma, Firenza e Bologna.
Prevista sin l'emna
Per la vart dal sid da las Alps è prognostitgà in'unda da chalira cun temperaturas da 32 fin 34 grads. Il pli chaud vegni il mardi. Temperaturas fitg chaudas ed undas da chaliras èn in fenomen natiral durant la stad, pervia da la midada dal clima capitan questas dentant pli regularmain ed a moda pli intensiva.
