Al «Super Tuesday» ha Donald Trump tar ils republicans gudagnà fin uss en bunamain tut ils 15 stadis. Sia suletta concurrenta Nikki Haley ha be pudì persvader il stadi da Vermont. En principi pudess Trump anc perder las preelecziuns republicanas, igl è dentant fitg pauc probabel.
Tar ils democrats ha sco spetgà Joe Biden fatg la cursa fin uss. Medemamain sco tar Trump ha la victoria er gì per Joe Biden ina macla. En il stadi Samoa-Americana han las votantas ed ils votants democratics sustegnì in auter candidat. Per il resultat final na gioga quai dentant betg ina rolla.
Trump ha gudagnà senza problems en Texas, California e Virginia. Al «Super Tuesday» vegnan repartidas radund in terz da las vuschs da delegadas e delegads per l'elecziun dal candidat da la partida, medemamain tar democrats e republicans. Nikki Haley ha enfin uss mo pudì gudagnar en il stadi pli u main liberal Washington. Donald Trump aveva en tuts auters stadis gudagnà cleramain.
Per Nikki Haley è mardi saira stada ina dischillusiun. Er a Virginia, ch'è plitost in stadi liberal, n'ha ella betg gudagnà cunter Trump. Sch'ella vegn a cuntinuar da candidar cunter Trump è suenter mardi avert. Fitg probabel han ils Stadis Unids da l'America puspè la tscherna tranter Joe Biden e Donald Trump sco president, sco gia il 2020.
