Il president dals Stadis Unids Joe Biden ha gudagnà sco spetga l'emprima elecziun preliminara uffiziala dals democrats el stadi da South Carolina e spera ch'el survegnia in stausch per l'ulteriur cumbat electoral. En ina enquista il prim da favrer tar electuras ed electurs a South Carolina han 73% inditgà ina preferenza per Biden.
Curt suenter ch'ils locals electorals èn stads serrads la sonda saira (temp local) han ils gronds emetturs da televisiun CNN, NBC, ABC e Fox News Biden declerà en lur prognosas sco victur cler e presupponì ina quota da vuschs da passa 96% per el. Ultra d'el han mo paucs commembers e commembras da la partida candidà.
Biden ha survegnì dapli vuschs a South Carolina ch'auters candidats, tranter auter ils deputads Dean Phillips da Minnesota e l'autura Marianne Williamson. En sia campagna ha il team da Biden mess il focus sin la gronda part d'electuras ed electurs cun origin afroamerican en il stadi federativ conservativ al sidost dal pajais.
Biden vul candidar per ina segunda perioda d'uffizi tar l'elecziun dal president ch'è il november. A l'intern da la partida n'ha el però nagina concurrenza ch'è da prender serius. L'um dad 81 onns es cun quai gia quasi nominà. La votaziun a South Carolina ha valì sco emprima emprova generala per sia campagna electorala – era perquai che blers electurs cun origin afroamerican vivan en il stadi conservativ dal Sid.
Plitost «ina missiun»
Joe Biden ha visità avant las preelecziuns la centrala da sia campagna electorala a Wilmington/Delaware. Il president dals Stadis Unids ha ditg a sia squadra: «I stat bler sin il gieu. Nus avain in'obligaziun immensa.» I sa tractia plitost dad «ina missiun», ha admonì l'um dad 81 onns. «Nus na dastgain betg perder quest cumbat electoral – per il bain dal pajais.»
Avant ch'i vegn tar il super Tuesday ils 5 da mars, datti il favrer anc elecziuns preliminaras en differents stadis. Tar ils republicans ha Donald Trump fin ussa ramassà las bleras vuschs. Tar ils democrats vala Joe Biden sco candidat. Las elecziuns dal congress e dal presidi han lieu en ils Stadis Unids ils 5 da november 2024.
