Durant il cumbat electoral en ils Stadis Unids ha RTR adina puspè sentì il puls tar persunas rumantschas che vivan en ils Stadis Unids. Uschia per exempel tar Anita Turner che viva dapi passa 40 onns ad Austin, en il stadi federativ da Texas, ina Sursilvana che ha dà sia vusch a Trump. Ella na saja nagin fan dad el sco persuna, ha dentant elegì Trump pervia da sia politica republicana. Ella è surtut leda ch'il resultat è stà cler.
Jau sun cuntenta cun il resultat e sper che Trump po puspè muventar insatge sco en sia ultima legislatura.
Tut auter vesa Claudius Vincenz quai. Per il Sursilvan che viva ad Ann Arbour en il stadi federativ da Michigan è il resultat ina gronda trumpada. El descriva l'elecziun sco «catastrofa». Che la cuntracandidata democrata Kamala Harris n'haja betg pudì persvader, haja divers motivs. Sia strategia haja magari fatg l'impressiun da betg savair tge ch'ella vul ed era ses uffizi da vicepresidenta saja forsa stà in crap da stgarpitsch, manegia Claudius Vincenz. Là haja ella savens fatg l'impressiun da betg tschappar en ils problems. Per il futur en ils Stadis Unids vesa el stgir.
Jau persunal na vegn betg a patir da l'elecziun, ma tut quellas persunas che dovran en ina moda u l'autra sustegn, vegnan a patir.
Co vai vinavant cun l'economia? Jon Pult e Roman Hug èn da differents avis
Ils dus cussegliers naziunals Roman Hug e Jon Pult n'èn betg perina sch'i va per l'effect che l'elecziun da Trump vegn ad avair sin l'economia. Il socialdemocrat Pult tema l'effect ch'ils dazis annunziads da Trump pudessan avair sin l'economia. Pli blers pissers fa el dentant per la democrazia e cuminanza internaziunala cun Trump a la testa. Roman Hug da la PPS vesa era schanzas, uschia per exempel ch'el vegnia da regular l'economia, quai che saja impurtant per la populaziun. Essenzial saja era la rolla neutrala da la Svizra per uschia pudair far bun commerzi cun ils Stadis Unids.
Ed il minister d'economia dal Grischun, Marcus Caduff di suenter l'elecziun ch'el giavischia stabilitad per il Grischun. La politica da l'exteriur e la tgira da relaziuns internaziunalas saja dentant pensum da la Confederaziun.
Per il Grischun, sco lieu economic e turistic, giavisch jau ina stabilitad globala e relaziuns fidaivlas cun ils stadis partenaris. Pertge situaziuns incalculablas fan per regla donn a l'economia.
Led da la reacziun a la bursa
Era l'economia privata en il Grischun ha persequità las elecziuns en ils Stadis Unids. Andrea Fanzun , il president da la Chombra da commerzi dal Grischun è cuntent che la bursa ha reagì bain sin l'elecziun da Donald Trump. La valur da las aczias è ida ad aut, quai che vul dir ch'ils investurs pensan che l'elecziun da Trump saja buna per els. Er il dollar è vegnì pli ferm. Quai saja en sasez bun per l'economia d'export da la Svizra.
Sch'impediments da commerzi sco ils dazis previs vegnan propi, fiss quai nausch per l'economia da la Svizra e dal Grischun.
L'autra vart da la medaglia sajan ils dazis che Trump ha annunzià da vulair auzar sin imports en ils Stadis Unids. Tenor Fanzun èsi impurtant d'avair bunas relaziuns cun l'America, cunquai ch'il pajais è il pli impurtant partenari per il commerzi d'export da la Svizra. Ils dazis annunziads fan perquai mal il venter.