Il cunfin svizzer cun l'Austria e la Germania duai puspè esser avert davent dals 15 da zercladur. Quai ha confermà il Departament da giustia a l'agentura da novitads Keystone-SDA. Premissa saja dentant ch'il svilup da la pandemia restia positiv.
Avant aveva il minister da l'intern tudestg Horst Seehofer declerà, ch'els vegnian mo pli a far singulas controllas da cunfin davent da sonda proxima. Ed era l'Austria prevesa da schluccar la bloccada cun la Svizra.
Cura ch'ils cunfins cun l'Italia e la Frantscha pudessan avrir, n'è il mument anc betg enconuschent.