Il material ch’il departament da defensiun e da la citad da Basilea han donà, haja ina valur totala da 5,2 milliuns francs, scriva il Departament federal d’affars exteriurs. La Direcziun per svilup e collavuraziun (Deza) organisescha e finanziescha il transport. Spezialists dal corp d’agid umanitar vegnan a surdar il material a las autoritads da protecziun civila dal ministeri da l’intern a Kiew suenter ina scolaziun al lieu.
En l’Ucraina vegnan transportads trais vehichels da stizzar, material per cumbatter incendis e 20 maschinas da construcziun per rumir ruinas e rument. La furniziun includa ultra da quai in vehichel per transportar persunas e material, dus indrizs mobils per serenar aua tschuffa, dus containers per la direcziun da l’acziun, generaturs d’electricitad.
Cun la furniziun ademplescha la Svizra ina supplica da las autoritads ucranaisas. Dapi l’attatga russa sin l’Ucraina il favrer ha la Deza transportà passa 680 tonnas rauba d’agid da la Svizra en l’Ucraina. Ultra da quai ha ella cumprà en l’Ucraina passa 4'750 tonnas mangiativas per la populaziun.
