- En parts da l'Europa Centrala e da l'Europa da l'Ost crescha la tema d'aua gronda e da las consequenzas.
- En l'Austria vala l'entira regiun enturn la chapitala Vienna sco territori da catastrofa.
- En la Tschechia èn 250'000 chasadas senza forza electrica.
- En la Rumenia moran almain sis persunas. Er en l'Austria, Pologna e Tschechia è mintgamai ina persuna najada.
- Ed er en Germania sa preparan plirs Bundesländer sin auas grondas.
En pliras parts da l’Europa Centrala e da l’Europa da l’Ost plovi dapi dis intensivamain. Pervia da las malauras èn fin il mardi almain 20 persunas mortas. Pliras valan anc sco sparidas. Las bleras unfrendas hai dà en la Rumenia. Era ferm pertutgads da las malauras èn la Tschechia e la Pologna. En la Pologna ed en la Tschechia èn entirs lieus sut l’aua. Era glindesdi duai plover vinavant intensivamain.
Uss sa preparan er ils Bundesländer Saxonia, Baviera e Brandenburg en la Germania sin auas grondas. La citad da Dresden ha proclamà il segund aut stgalim d’alarm, damai ch’il livel da l’Elba crescha vinavant. Per ordinari è il livel d'aua da l'Elba circa 2 meters auts. I vegn quintà ch'il livel surpassa anc en il decurs dal gliendisdi la marca da 6 meters. En la Baviera han ins registrà inundaziuns pli pitschnas. Enturn la citad da Rosenheim ha la polizia infurmaziuns da singuls auals ch'èn ids sur la riva ed han inundà vias.
Austria Bassa è vegnida declerada sco territori da catastrofa
La situaziun d’auas grondas è anc ina giada s’intensivada en l’Austria. En il Bundesland «Austria Bassa» sajan ils emprims rempars ruts enturn la chapitala Vienna. Pliras vischnancas sajan vegnidas inundadas. Quai rapportan medias localas. Las autoritads localas han declerà l’entir Bundesland sco territori da catastrofa. Per il gliendisdi vegnia spetgà en la regiun fin 80 liters da plievgia pro meter quadrat.
Igl n'è anc betg finì, la situaziun resta critica e dramatica.
A Vienna èn pliras vias inundadas e terrassas da restaurants èn medemamain sut l'aua. Il livel dal «Wienfluss» è creschì entaifer in di da 50 centimeters sin prest 2,30 meters. La vita da mitgadi stettia per gronda part airi per il mument, blers uffants da scola sajan restà a chasa e pli che 200 vias èn serradas. En l'Austria Bassa – il Bundesland enturn la chapitala Vienna – è in pumpier mort en il cumbat cunter las auas grondas. Quai han communitgà las autoritads localas. La situaziun è zunt tendida en la regiun Waldviertel, en il nord da la chapitala Vienna. Là maina il flum Kamp che cuntinuescha en il Danubi gia aua gronda massiva. Vis sur blers onns è la situaziun uschia, sco i dat mo mintga 100 onns ina giada.
250'000 chasadas senza forza electrica en Tschechia
Pervi d'inundaziuns che smanatschan ha era la Tschechia evacuà ulteriuras persunas. Ad Opava al cunfin cun la Pologna han millis da persunas stuì bandunar lur chasas per raschuns da segirezza, han las autoritads communitgà la sonda saira. Er en auters lieus da la regiun han tschients umans stuì fugir. La citad Krnov saja tenor il substitut dal president da vischnanca inundada per 70 fin 80%, per evacuaziuns saja uss memia tard. Quatter persunas valan sco sparidas. En l'entir pajais èn tenor indicaziuns uffizialas radund 250'000 chasadas senza current electric.
En l'entir pajais valeva pervi da l'aua gronda tar dapli che 120 staziuns da mesiraziun il stgalim d'alarm. Tar passa 50 staziuns è schizunt vegnì annunzià in'aua gronda sco i dat be mintga 100 onns ina giada.
La situaziun en Pologna
En la Pologna ha il schef da la regenza Donald Tusk numnà la notg sin dumengia ina «sfida dramatica». En plirs lieus da la Pologna haja gia dà dapli plievgia che tar l'uschenumnà diluvi dal tschientaner il 1997, ha ditg Tusk. El ha appellà als burgais da sa render en lieus segirs, en vista als livels da l'aua da blers flums en il sidvest da la Pologna che creschan. 1'600 persunas sajan vegnidas evacuadas.
En pli saja rut in mir da serra en il sidvest da la Pologna al cunfin cun la Tschechia. Suenter che la serra a Stronie Slaskie ha cedì, cula l'aua ussa en il flum Biala Ladecka e prendia curs sin il territori da la citad da Glatz.
I saja ina smanatscha seriusa per ils lieus per lung da quests flums. Las autoritads na quintan per il mument betg che la situaziun sa calmia.
Pliras unfrendas en Rumenia la sonda
En la Rumenia èn almain sis persunas mortas pervi da las fermas malauras, tranter quellas duas dunnas da 96 ed 86 onns. Ulteriuras 90 persunas hajan stuì vegnir evacuadas, scrivan medias indigenas. En ils lieus pertutgads haja l'aua cuntanschì in'autezza dad 1,7 meters. La glieud saja fugida sin tetg per betg vegnir tschiffada da l'aua. Tenor las forzas da salvament saja probabel anc blera glieud veglia – ch'è restrenschida nà da la mobilitad – bloccada en ils lieus d'inundaziuns.
