Lavur voluntara en Kenia - «Nus vulevan vesair insatge cumplettamain auter»

Cunzunt l'entschatta saja stà difficil da s'endisar. La paupradad al lieu, vias na planivas cun foras, chasas modestas cun tetgs nunfinids ed installaziuns sanitaras las pli simplas.

Che sia dunna saja stada da la partida sco era las persunas cordialas al lieu, haja gidà a s’endisar. Uschia lavura l’um da 35 onns ussa dapi la fin da settember tar in’organisaziun d’agid en il pitschen vitg da Kiptere. Là vivan 1'000-2'000 persunas, aua currenta na datti betg en las chasas. L’electricitad saja avant maun, ma ella crodia savens ora, gist durant il temp da plievgia.

Agid al lieu

L'organisaziun d'agid sustegna la populaziun al lieu tar l'elavuraziun d'aua da baiver e porscha en in atelier d'art la pussaivladad da producir objects che vegnan vendids a martgads al lieu e sur l'internet en Svizra.

Ultra da quai maina l'organisaziun d'agid, ch'è vegnida fundada en Svizra, in project da café. En quest connex survegnan ils purs 200 plantinas, che portan ils emprims fritgs suenter in fin dus onns. Cun il gudogn da la vendita dal café, po la scola dals uffants vegnir finanziada. Uschia sustegna il project actualmain 300 purs ed en tut passa 1'000 uffants.

Dario Albin, ch'ha interrut sia lavur sco directur da construcziun en Svizra per sis mais, sustegna il team al lieu cunzunt en biro e tar la staziun da preparaziun dal café giuadora. Là vegn il café paletschà, nettegià e preparà per l'ulteriura elavuraziun .

Quasi tut ils indigens discurrian englais, uschia na saja la communicaziun nagin problem. Vitiers sajan ils indigens fitg averts e cordials envers il pèr svizzer, uschia ch'els sa sentian fitg bainvegnids.

Il mintgadi tranter plantaschas da cafè a Kiptere en Kenia cuntinuescha per il pèr svizzer anc enfin la fin da december.